Net wäit vu Lissabon ass de Weekend iwwer déi zweet Course vun dëser Saison an der FIM EWC gefuer ginn.

De Weekend stoung am Motorradsport déi zweete Course vun der Laangstrecken-Weltmeeschterschaft um Programm.
F.C.C. TSR Honda France huet sech d'Victoire bei den 12 Stonne vun Estoril a Portugal geséchert. An engem spannenden Dräikampf ëm déi 2. Plaz huet sech um Enn SRC Kawasaki géint BMW a VRD-Yamaha duerchgesat.

SRC Kawasaki louch bei den 12 Stonne vun Estoril mat enger komfortabeler Avance an der Schlussphas a Féierung, ma dunn ass de Motorrad op eemol stoe bliwwen. Den Erwan Nigon war um Wee an d'Box, wéi seng Maschinn ausgaangen ass an de Fransous op Grond vun engem Manktem u Bensinn net méi fuere konnt. De Pilot huet du säi Motorrad zu senger Ekipp rulle missen an Honda huet d'Spëtzepositioun iwwerholl.

Mam Chris Leesch ass och ee Lëtzebuerger matgefuer, dëst an der Superstock-Klass. An der FIM EWC gëtt an zwou Klassen differenzéiert, d’EWC-Klass an d’Superstock-Klass.

No enger ganz enttäuschender Course zu Le Mans (24h), wou een duerch eng Chute vun engem anere Fuerer gezwonge war opzeginn, wollt d’Ekipp ronderëm de Chris Leesch sech a Portugal nees zeréckkämpfen.

No enger ustrengender Woch fir déi ganz Ekipp war ee gudder Déng, datt et no enger zefriddestellender Qualifikatioun och an der Course klappe kéint an een hei villäicht souguer mat enger Podiumsplaz rechne kéint. D’Ekipp RAC-41-Chromeburner gouf an der Qualifikatioun nach déi 16. am Ganzen a 5. an der Superstock-Klass, dat mat engem Retard vun 0,489 Sekonnen op de beschtplacéierte Superstock-Fuerer.

Leider hunn dës Hoffnunge sech relativ kuerz nom Start vun der Course awer séier erëm opgeléist. De Wayne Tessels, dee fir d’Ekipp un den Depart gaangen ass, huet séier misse feststellen, datt net déi richteg Reglagë fir d’Course gewielt goufen a si doduerch dann och Schwieregkeeten haten, den Uschloss ze halen.

No 3 Stonne Course war d’Ekipp duerch ee Lach am Küler gezwongen, ee längere Pit Stop anzeleeën. Esou waren dann och d'Hoffnunge fort, fir eng gutt Placéierung a Portugal erausfueren ze kënnen.

Sief dëst net genuch Misär, koum no 5 Stonnen och nach eng Bensinspann dobäi, wouduerch d’Course dann komplett gelaf war fir d’Ekipp. Si hunn de Kapp awer net an de Sand gestach a sinn déi rechtlech 7 Stonne fäerdeg gefuer. Dëst hëlleft der Ekipp enorm, fir Donnéeën ze sammelen, déi hinnen erméiglechen, esou Komplikatiounen an Zukunft ze vermeiden a soumat de Moto och besser ze regléieren.

Elo stinn 2 Preparatiounscourssen um Programm, déi éischt Mëtt August zu Spa Francorchamps an dann Enn August ee weideren Test a Frankräich. D’Ekipp hofft, sech esou optimal op déi nächst offiziell 24-Stonnen-Course vum Championnat vum 16. bis den 19. September zu Le Castelet, um Paul Richard Circuit zu Bol d’Or, preparéieren ze kënnen.