Zanter en Dënschdeg den Owend 20.32 Auer ass de Ralph Diseviscourt bei der Race Around Austria am Asaz. Enger Course iwwer ronn 2.200 Kilometer.

Mëttlerweil ass den Ultracyclist gutt 22 Stonne bei der Race Around Austria ënnerwee (Stand 18.30 Auer e Mëttwoch). De ganzen Dag iwwer waren et ëm déi 32 Grad. Bis elo huet de Ralph Diseviscourt nach keng Paus gemaach.

Virun der zweeter Nuecht, läit de Lëtzebuerger Ultracycliste op der 3. Plaz. Allerdéngs just knapps hannert dem Däitsche Rainer Steinberger. Éischten ass den Éisträicher Christoph Strasser, deen eng Avance vu ronn 30 Kilometer op den Duo Steinberger/Diseviscourt huet.

No ronn 22 Stonne Course ass de Ralph Diseviscourt eng 700 Kilometer gefuer. Am Ganzen sinn 2.170 Kilometer an Éisträich ze fueren.

Mëttlerweil rullt also gutt beim Lëtzebuerger. Den Depart en Dënschdeg den Owend war nämlech e bësse problematesch. Säin Navigatiounssystem hat net funktionéiert. Deen Ament waren d'Leit am Auto, mat ënnert anerem sengem Brudder Luc, gefuerdert.

De Luc Diseviscourt

"Dat heescht, mir hunn dunn d'Navigatioun ganz fir hie musse maachen. Déi éischte Stonn huet all Uso musse sëtzen, dat war relativ hefteg, well mir du vill kleng Weeër hu musse fueren. Entretemps hunn d'Leit am Camper un engem zweete geschafft, fir deen opzebauen. Si haten och Problemer. De Fichier hu mir mussen a verschidde Sequenzen deelen. Entretemps huet déi ganz Saach awer nees Form ugeholl. Dat heescht deen, deen hien elo drop huet, huet sech nees erholl. Sécherheetshallwer maache mir awer een zweete fäerdeg mat deenen 8 eenzele Streckenofschnëtter, fir wann nach eng Kéier ee Problem optaucht, dass mir dee kënne benotzen.", erkläert de Luc Diseviscourt.

D'Arrivée vun der Race Around Austria ass am Laf vum Samschdeg.