En Donneschdeg hu sech d'Escher Jeunesse an de Progrès Nidderkuer fir déi zweet Ronn vun der Europa-League-Qualifikatioun qualifizéiert.

Progrès Nidderkuer - Cork City 1:2

De Progrès Nidderkuer konnt den Allersmatch an Irland iwwerraschend mat 2:0 gewannen an hat domat also schonns e grousse Schratt a Richtung 2. Tour gemaach.

En Donneschdeg den Owend hate si awer hir Problemer mat de Gäscht vu Cork City. D'Formatioun aus Irland war ganz geféierlech an no 3 Minutte stoung et dunn och schonns 0:1 aus der Siicht vum Progrès. Do war et nämlech de Buckley, dee markéiere konnt.

Nodeems de Flauss vill gutt Parade gewisen huet, huet hien an der 47. Minutt eng zweete Kéier missen hannert sech gräifen. Do konnt de McCarthy nämlech op 2:0 stellen.

Zu dësem Moment wier et also an d'Verlängerung gaangen, domat wollt de Progrès sech awer net zefridde ginn an an der 68. Minutt konnt de Bah, deen eréischt 2 Minutte virdrun agewiesselt gi war, op Virlag vum Sebastien Thill den 1:2 schéissen.

Esou ass et bis zum Schluss bliwwen, esou dass Nidderkuer trotz enger Néierlag an der 2. Ronn steet.

Progrès trotz Néierlag an der Europa League weider
Am Retourmatch huet Nidderkuer mat 1:2 géint Cork City verluer. Den Allersmatch hat een am 1. Tour vun der Qualifikatioun mat 2:0 gewonnen.

Tobol Kostanay - Jeunesse Esch 1:1

© Jeunesse Esch

Nodeems d'Escher Jeunesse d'lescht Woch doheem 0:0 géint Tobol Kostanay gespillt haten, hate si déi besser Ausgangspositioun en Donneschdeg den Owend.

De Match huet fir de Lëtzebuerger Rekordchampion awer net all ze gutt ugefaangen, well no 22 Minutte louche si mat 0:1 hannen, et war den Halim Meddour, deen de Ball am eegene Gol ënnerbruecht huet.

An der zweeter Hallschent ass et dunn awer besser gelaf fir d'Escher Jeunesse. An der 59. Minutt krut d'Ekipp vun der Grenz een Eelefmeter zougesprach, deen de Mehmet Arslan erageschoss huet.

Bis zum Schluss sollt sech un deem Resultat näischt méi änneren an esou ass d'Jeunesse duerch den Auswäertsgol een Tour weider. An der nächster Ronn geet et elo géint Vitoria Guimaraes aus Portugal. De Match ass nächsten Donneschdeg um 20.30 Auer am Stade Josy Barthel.