Diddeleng ass mat engem 3:1-Virsprong op Tallin gereest a wollt do mat engem gudde Resultat an de 4. Tour vun der Europa-League-Qualifikatioun kommen.

En Dënschdeg den Owend hat den F91 Diddeleng déi grouss Chance wouergeholl, fir an de 4. Tour vun der Europa-League-Qualifikatioun ze kommen. No dem 3:1-Succès vun der leschter Woch am Allersmatch war d'Ekipp aus der Forge du Sud auswäerts zu Tallin bei Kalju Nõmme op en Neits erfollegräich.

AUDIO: Reaktioun: Tom Schnell nom Match

Sollt de Lëtzebuerger Champion am 4. Tour vun der Europa-League-Qualifikatioun, also de Playoffs, weiderkommen, da géing et duerno nees an d'Gruppephas vun der Europa League goen.

Kalju Nõmme - F91 Diddeleng 0:1

Diddeleng war an den Ufanksminutten dem Drock vun den Esten ausgesat. D'Lëtzebuerger stoungen awer an der Defense zolidd an hu sech op d'Kontere besënnt. Ma wat déi éischt Hallschecht méi laang am Gaange war, wat den F91 besser an de Match koum a sech Chancen erausgespillt huet. Vun der 35. Spillminutt u war d'Ekipp aus der Forge du Sud dunn an Iwwerzuel, well de Vladyslav Khomutov fréi déi giel-rout Kaart gesinn huet.

De Lëtzebuerger Champion hat am éischten Duerchgang d'Saach iwwer wäit Strecken am Grëff a sou huet de russeschen Arbitter Lapochkin béid Ekippe mat engem 0:0 fir d'Paus an d'Kabinne geschéckt.

Och an der zweeter Hallschent war d'Ekipp aus der Forge du Sud een Tick besser an an der 56. Minutt si si dem nächsten Tour du ganz no komm, do war et nämlech de Sinani, deen de Lëtzebuerger Champion a Féierung brénge konnt.

Bis zum Schluss ass et bei dësem Resultat bliwwen, esou dass den F91 Diddeleng op en Neits an déi lescht Ronn vun der Qualifikatioun anzitt. An do kréie si et entweder mat Ararat aus Armenien ze dinn oder mat Saburtalo Tiflis, wou ënnert anerem de Levan Kenia spillt, deen d'lescht Joer nach am Dress vum F91 gespillt huet.

Wéi geet et elo weider?

An der 3. Qualifikatiounsronn vun der UEFA Europa League konnt sech den F91 Diddeleng wéi gesot an Estland mat enger 1:0-Victoire géint Kalju duerchsetzen. D'nächst Woch an déi Woch drop sti soumat d'Playoffs fir d'Equipe aus der Forge du Sud um Programm. Wéi genau geet et dann elo weider fir den F91?

AUDIO: Wéi geet et weider fir den F91 / Reportage vum Max Kerschen

Um Mëttwoch den Owend wësse mer, wien de Géigner vum F91 an den Europa League Playoffs ass. Eppes ass awer kloer, et geet a Richtung Osteuropa fir de Lëtzebuerger Doublé-Gewënner. Saburtalo aus Georgien konnt säin éischte Match auswäerts an Armenien géint Ararat gewannen an huet soumat gutt Chancen, fir eng Ronn weiderzekommen. An do géif een dann och op en ale Bekannten treffen. Fir de Manou Goergen, dee beim F91 zoustänneg ass fir déi international Matcher a fir d'Relatiounen mat der UEFA, brauch den F91 sech awer op kee Fall ze verstoppen.

"Um Pabeier gesi se net sou aus wéi d'Géigner vum leschte Joer, mä et däerf ee se awer op kee Fall ënnerschätzen. De Levan Kenia, dee lescht Saison nach bei eis gespillt huet, steet elo bei Saburtalo ënner Kontrakt. Fir mech gëtt et kee klore Favorit an et wäerte 50/50 Matcher ginn."

Eng Participatioun un der Gruppephas vun der Europa League ass fir den F91 also duerchaus realistesch. D'Qualifikatioun an och d'Organisatioun sinn awer u vill Konditioune gebonnen.

"Et wäert ganz vill Aarbecht op eis duerkommen. Nom Match heiheem ass direkt den Dag drop d'Auslousung vun der Gruppephas zu Nyon, wou een och muss present sinn. An da geet d'Organisatioun fir d'Matcher un, wou dann den Austausch tëscht dem Veräin an der UEFA immens wichteg ass."

Den Allersmatch ass fir den 22. August, also nächst Woch en Donneschdeg geplangt, do muss Diddeleng auswäerts untrieden. De Réckmatch ass dann eng Woch drop, also den 29. August am Stade Josy Barthel an der Stad.