De Maurice Deville war bei Mannheim-Victoire am Asaz an den Dirk Carlson souz bei der Auswäertsdefaite vum Karlsruher SC 90 Minutte laang op der Bänk.

Méindeg

An der Nuecht op e Méindeg, eiser Zäit, war de Maxime Chanot mat New York City géint den FC Cincinnati. De Lëtzebuerger Nationalspiller war beim 4:1-Erfolleg auswäerts déi ganz Spillzäit iwwer am Asaz.

Sonndeg

An der Ukrain hat den Ex-Nidderkuerer Tim Hall säin Debut mat Karpaty Lviv. Auswäerts goung et géint Olimpik Donezk an no den éischte 45 Minutte louchen d'Gäscht scho mat 2:0 a Féierung. No den 90 Minutten, déi den Hall, grad esou wéi de Marvin Martins, duerchgespillt huet, konnt Karpaty sech iwwert een 3:1-Erfolleg freeën.

Bei der 2:0-Victoire vum FK Ufa a Russland géint FK Rostow war den Oli Thill net am Asaz.

De Lars Gerson war mat Norrköping um 20. Spilldag an der ieweschter schwedescher Divisioun beim IK Sirius op Besuch. De Lëtzebuerger gouf an der 63. Spillminutt beim Stand vun 0:0 agewiesselt a konnt no den 90 Minutten eng 2:0-Victoire feieren.

An der 3. Liga an Däitschland ass den 1. FC Kaiserslautern, de Veräin vum Investisseur Flavio Becca, doheem nawell ënnert d'Rieder komm. Géint Eintracht Braunschweig gouf et eng 0:3-Néierlag virun eegenem Public.

Och dem Dirk Carslon säi Nomëtteg war net vum Erfolleg gekréint. De Lëtzebuerger Nationalspiller war mat sengem neie Veräin Karlsruher SC fir de Kont vum 3. Spilldag an der 2. Bundesliga bei Holstein Kiel op Besuch. Bei der 1:2-Auswäertsdefaite koum de Carlson net an den Asaz - hie souz déi 90 Minutten iwwer op de Bänk.

Méi erfollegräich war dem Maurice Deville säi Veräin Waldhof Mannheim. Um 5. Spilldag vun der 3. Liga konnt sech den Deville auswäerts bei Carl Zeiss Jena mat enger 2:1-Victoire iwwert déi 3 Punkte freeën. De Lëtzebuerger war déi gesamte Spillzäit iwwer am Asaz.

Samschdeg

An der 3. Bundesliga war de Jeff Saibene mat Ingolstadt bei Uerdingen op Besuch. D'Ekipp vum Lëtzebuerger Trainer konnt sech mat 3:0 zu Uerdingen duerchsetzen an ass elo Leader an der 3. Bundesliga.

Nieft de Lëtzebuerger Anthony Moris am Gol an dem Kevin Malget stoungen nach den Edisson Jordanov, de Clement Couturier, de Jerry Prempeh an de Samir Hadji an der Startformatioun vu Virton an der 2. belscher Liga. Bei der 3:0-Victoire géint Lommel gouf den Dave Turpel an der 72. Minutt nach fir de Samir Hadji agewiesselt, de Jodanov konnt an der 45. Minutt fir d'1:0-Féierung markéieren.

An der Regionalliga Südwest an Däitschland koum déi 2. Ekipp vu Mainz 05 mam Florian Bohnert zu Walldorf net iwwer een 0:0 eraus. De Lëtzebuerger stoung an der éischter Eelef.

Den Enes Mahmutovic stoung an der Startformatioun bei Maastricht, ma de Match huet net gutt ugefaangen. No Goler an der 27. an der 35. Minutt si se mat 0:2 am Réckstand an d'Paus gaangen. Si konnten de Match och net méi dréinen, an der Nospillzäit hu si donieft nach den 0:3 kasséiert. Esou konnt de Graafschapp hei 3 Punkte mathuelen.

Nodeem Lille, d'Ekipp vum Gerard Lopez, um éischte Spilldag gewanne konnt, gouf et eng knapp Néierlag zu Amiens. Lille war no 39 Minutten an Ënnerzuel. Ma et huet bis déi 70. Minutt gedauert, bis den Guirassy seng Fans konnt jubelen doen, andeem hien den eenzege Gol an dëser Partie geschoss huet.

Freideg

An der 58. Minutt gouf de Vincent Thill agewiesselt, dat nodeem säi Ekipp US Orléans zanter der 24. Minutt géint Clermont Foot hanne war. Ma och de Lëtzebuerger konnt net méi vill un der Situatioun änneren, esou datt si dës Punkten hu missten ofginn.

An der Schwäiz konnte sech d'Young Boys Bern 1:0 an der Coupe géint Etoile Carouge duerchgesat. De Lëtzebuerger Christopher Martins stoung net am Kader.