Iwwerdeems behaapt sech d'Jeunesse op der Grenz mat 2:1 géint Rouspert an Déifferdeng setzt sech zu Stroossen duerch.

Sonndeg

Ettelbréck - Munneref 1:3
0:1 Eren (17'), 1:1 Melo (25'), 1:2 Mohammed (53'), 1:3 Oliveira (89')

Zu Ettelbréck war et de Gaascht vu Munneref deen no 17 Minutten a Féierung goe konnt. Den Eren huet e Géigespiller no engem Corner mat engem Crochet stoe gelooss an huet aus ronn 22 Meter den 1:0 geschoss. Laang sollt d'Munnerefer Féierung awer net halen. An der 25. Minutt war et nämlech de Melo, deen no engem kuerz ausgefouerte Corner zum 1:1 ausgläiche konnt. Am weidere Spillverlaf haaten nach béid Ekippe Chancen zur Féierung. Déi bescht Aktioun hat kuerz virun der Paus no engem gudden Zouspill duerch d'Defense den D'Alessandro, deen de Ball awer knapps laanscht de Gol geschoss huet. Mam 1:1 ass et also an d'Vestiairë gaangen.

No der Paus konnt de Mohammed d'Etzella mat engem schéine Fräistouss iwwerraschen a Munneref nees a Féierung bréngen. Nom Géigegol huet sech d'Lokalekipp schwéier gedoen nees an de Match ze fannen. Bescht Chance an der zweeter Hallschent hat dann awer den Holtz, dee mat engem Distanzschoss awer just d'Lat getraff huet. Ettelbréck huet den Ausgläich zwar gesicht, ma den Oliveira huet mat engem Volley zum 3:1 an der 89. Minutt alles entscheet an der Ekipp vu Munneref déi dräi Punkte geséchert.

© Jan Fisch

Stroossen - Déifferdeng 1:3
0:1 Buch (25'), 1:1 Hayasaka (53'), 1:2 Bettmer (65'), 1:3 Buch (84')

Stroossen ass gutt an de Match komm an huet och fréi Drock op de Géigner gemaach. Sou waren de Szimayer an der 3. Minutt an den Hayasaka zwou Minutte méi spéit awer ouni Succès virum Gol. An der 25. Minutt war et dann awer de Gaascht vun Déifferdeng dee mat 1:0 a Féierung gaangen ass. De Buch huet déi éischt richteg Chance genotzt an dem Schon am Gol mat engem flaache Schoss an de laangen Eck keng Chance gelooss. Nom Géigegol huet sech Stroossen méi schwéier gedoen a sou ass déi éischt Hallschent mat engem 0:1 Réckstand aus der Siicht vun der Lokalekipp op en Enn gaangen.

Nom Säitewiessel huet Stroossen nees zou sech fonnt an den Ausgläich gesicht. An der 53. Minutt huet den Hayasaka deen dann och mat sengem Gol zum 1:1 fonnt. Säi Schoss an de lénksen Eck huet dem Amodio am Gol keng Chance gelooss. 12 Minutte méi spéit ass et dann awer den nächste Réckschlag fir d'Lokalekipp ginn. Den Deruffe huet de Ball op de Bettmer geflankt, dee mam Kapp op 2:1 stelle konnt. Och nom Géigegol war Stroossen weiderhin déi Ekipp déi méi Drock gemaach huet an och méi vum Match hat. Déifferdeng war awer einfach méi effektiv a sou war et an der 84. Minutt de Buch, dee mat sengem zweete Gol zum 3:1 de Match entscheede konnt. Zum Schluss wënnt de Gaascht also mat 3:1 géint eng Stroossener Ekipp, déi sech op Mannst ee Punkt verdéngt hätt.

Hueschtert - Racing 0:3
0:1 Bouché (9'), 0:2 Ikene (22'), 0:3 Nakache (67')

E gutt ausgespillte Konter huet de Racing mat 1:0 a Féierung bruecht. No engem Zouspill vum Da Mota konnt de Bouché mat engem Schoss an de Wénkel den éischte Gol vum Match schéissen. Vill Ongenauegkeeten a wéineg Golchancen hunn de Match bestëmmt. Trotzdeem huet de Gaascht um Sonndeg net vill Chance néideg, fir Goler ze schéissen. Sou war et an der 22. Minutt den Ikene, dee mat der zweeter richteger Chance am Match op 2:0 erhéije konnt. Mat enger verdéngter Féierung fir d'Gäscht ass déi éischt Hallschent op en Enn gaangen.

Nom Säitewiessel huet sech um Spillverlaf net vill geännert. Vun Hueschtert ass et keng Golchance ze ziele ginn a sou huet de Racing an de 67. Minutt am Numm vum Nakache op 3:0 erhéicht. No engem Kappball aus kuerzer Distanz hat de Pleimling am Gol keng Chance de Ball ze halen. Zum Schluss gewënnt de Racing kloer a verdéngt géint eng erschreckend schwaach Lokalekipp.

© Eugène Thommes

Jeunesse - Rouspert 2:1
1:0 Boakye (10'), 2:0 Boakye (50'), 2:1 Biedermann (70')

D'Jeunesse ass no enger ausgeglachener Ufanksphas ëmmer méi geféierlech ginn. Sou ass dann och zimlech fréi den éischte Gol am Match gefall. De Boakye stoung no engem Corner op der beschter Plaz a mat engem Kappball den 1:0 fir d'Escher Jeunesse schéissen.
Rouspert huet sech schwéier gedoen an de Match ze fannen, an der 23. Minutt ass et dann awer en ëmstriddenen Eelefmeter fir d'Gäscht ginn. Ugetrueden ass de Lascak, deen de Ball op de Potto schéisst an et sou bei der 1:0 Féierung fir d'Jeunesse bis d'Paus bliwwen ass.

No der Paus ass Rouspert besser aus de Vestiairë komm, ma d'Jeunesse konnt nees profitéieren an den zweete Gol schéissen. De Boakye huet no enger schéiner Pass an de Laf vum Fiorani op 2:0 erhéicht. D'Gäscht hunn trotz den zwee Géigegoler net opginn a sinn an der 70. Minutt dann och mam Gol belount ginn. De Biedermann konnt mam Kapp op 2:1 verkierzen. D'Rousperter hunn elo op den Ausgläich gedréckt, ma zum Schluss sollt et net fir ee Punkt duergoen, deen net onverdéngt gewiescht wär.

© Kevin Estebanez

Millebaach - Fola 3:2
1:0 Cheriak (17'), 1:1 Kocur (31'), 2:1 Deyingo (57'), 3:1 Bop (83'), 3:2 Correia (90')

An der Ufanksphas huet sech d'Lokalekipp hanne gutt organisiéiert, sou dass de Gaascht vun Esch et schwéier hat e Wee virun de Gol ze fannen. An der 17. Minutt war et dann den Opsteiger Millebaach deen a Féierung goe konnt. Den Cheriak huet dem Golkipp mat engem schéine Schoss an de Wénkel keng Chance gelooss. No enger hallwer Stonn ass et dann en Eelefmeter fir d'Gäscht ginn. De Kocur ass vum Punkt äiskal bliwwen a konnt zum 1:1 ausgläichen. Mat deem Resultat, wat e bësse glécklech fir d'Fola war, ass et dann och an d'Vestiaire gaangen.

Och no der Paus huet sech d'Fola schwéier gedoen an de Match ze fannen. Dat huet Millebaach ausgenotzt a sou war et den Deyingo an der 57. Minutt, deen d'Haushären nees a Féeierung brénge konnt. De Jeff Strasser huet probéiert mat sengen Auswiesslungen eppes ze bewierken, awer och dat ouni Succès. An der 83. Minutt huet den agewiesselte Mersch de Ball am Strofraum mat der Hand ugepak. Per Eelefmeter konnt de Bop doropshin äiskal op 3:1 erhéijen an de Match sou gutt wéi entscheeden. Och wann den agewiesselte Correia mat sengem éischte Ballkontakt nach an der 90. Minutt op 3:2 verkierze konnt, geléngt Millebaach zum Schluss d'Iwwerraschung mat enger 3:2 Victoire géint d'Escher Fola.

E Méindeg kënnt et zum Ofschloss vum 4. Spilldag zum Toppmatch tëscht dem Progrès Nidderkuer an dem F91 Diddeleng.

Samschdeg

Péiteng - Rodange 4:1

Béid Ekippen hu vill Wäert op eng gutt defensiv Aarbecht geluecht, sou dass een zu Péiteng an der Ufanksphas net all ze vill offensiv Aktioune gesinn huet. Kuerz virun der Paus hunn déi ronn 600 Spectateuren dann awer nach den éischte Gol vum Match gesinn. De Gashi konnt d'Virlag vum Hamzaoui gutt notzen an den 1:0 fir Péiteng schéissen.

Och nom Säitewiessel war vu Rodange net all ze vill ze gesinn. An der 72. Minutt huet sech d'Lokalekipp da mam 2:0 belount. Den Abreu konnt no engem Zouspill vum Soladio op 2:0 erhéijen. Zwou Minutten drop huet Rodange dann awer op 2:1 verkierzt. Den Ndiaye konnt sech no engem Corner duerchsetzen an den 2:1 markéieren. Rodange wollt elo natierlech den Ausgläich, wat sech mat engem weidere Gol fir Péiteng dräi Minutte méi spéit awer nees méi schwéier gestalt huet. Den agewiesselten Teixeira konnt mat engem ofgefälschte Schoss op 3:1 erhéijen. Kuerz viru Schluss huet dann de Soladio alles entscheet a mat sengem Gol zum 4:1 definitv déi dräi Punkte fir d'Lokalekipp vu Péiteng geséchert.

Den Iwwerbléck vun der BGL Ligue

Den Iwwerbléck vun der Éierepromotioun