E Freideg de Mëtteg stoungen d'Véierelsfinalle beim WTA-Tournoi op der Kockelscheier um Programm. Mam Julia Görges ass d'Titelverdeedegerin nach mat dobäi.

Beim WTA-Tennis-Tournoi op der Kockelscheier stinn e Freideg den Owend d'Halleffinalistinne fest. E Samschdeg de Mëtteg um 14 Auer geet et tëscht dem Jelena Ostapenko an dem Anna Blinkova ëm deen éischten Ticket fir d'Finall. Um 16 Auer decidéiert sech da wien als zweet Spillerin nach d'Chance op den Titel huet an dat tëscht dem Elena Rybakina an dem Julia Görges.

Matcher am Iwwerbléck

Rybakina a Blinkova stinn an der Halleffinall
E Freideg de Mëtteg stoungen déi éischt zwou Véierelsfinalle beim WTA-Tournoi op der Kockelscheier um Programm.

An der éischter Partie stounge sech de Freideg de Mëtteg d’Laura Siegemund aus Däitschland an déi op Nummer 3 gesaten Elena Rybakina géigeniwwer. D'Kasachin huet d'Partie vun Ufank un dominéiert an huet um Enn souverän mat 6:0 a 6:4 gewonnen.

An der Halleffinall kritt d'Elena Rybakina et mat der Titelverdeedegerin Julia Görges ze dinn. Déi däitsch Spillerin konnt sech an enger spannender Véierelsfinall an 3 Sätz mat 1:6, 6:2 a 6:3 géint d'Monica Puig aus Puerto Rico duerchsetzen.

An de Véierelsfinalle koum et och zu engem reng russeschen Duell tëscht dem Margarita Gasparyan an dem Anna Blinkova. E Freideg de Mëtteg huet d'Blinkova ee gutt Stéck méi frësch gewierkt a konnt sech schonns fréi am 1. Saz mat engem Break belounen. Um Enn huet si den éischte Saz dunn och mat 6:3 gewonnen. No dësem Saz huet d'Gasparyan dunn ee Medical Timeout geholl. Dee sollt awer net hëllefen an esou huet si opginn.

E Freideg den Owend konnt sech d'Jelena Ostapenko och den Ticket fir d'Ronn vun de beschte Véier sécheren. D'Lettin huet dem Antonia Lottner aus Däitschland net en Hauch vun enger Chance gelooss a sech kloer an 2 Sätz mat zweemol 6:1 behaapt. Si kritt et an der Halleffinall mam Anna Blinkova ze dinn.

De Programm op RTL

BGL BNP Paribas Luxembourg Open: 1/2-Finallen
(mat Kommentar vum Franky Hippert a Gilles Muller)
Samschdeg, 19. Oktober vu 14h un - Programm vum 1. RTL

RTL Sport Spezial: Tennis
Samschdeg, 19. Oktober um 19h00 - Programm vum 1. RTL

BGL BNP Paribas Luxembourg Open: Finall
(mat Kommentar vum Franky Hippert a Gilles Muller)
Sonndeg, 20. Oktober vu 15 Auer un - Programm vum 1. RTL