An engem dramatesche Match ka sech Wales um Ënn mat 20:19 géint Frankräich duerchsetzen a steet domatt an der Halleffinall vun der Rugby-WM.

E Sonndeg stoungen déi läscht Véirelsfinallen vun der Rugby-Weltmeeschterschaft a Japan um Programm. Wales konnt sech um Enn mat 20:19 géint Frankräich duerchsetzen a Südafrika kann mat 26:3 géint Japan gewannen.

Et waren d'Fransousen, déi besser an den Match komm sinn, an an der Halschent mat 19:10 géint Wales a Féierung louchen. Knackpunkt am Match war déi rout Kaart fir de Fransous Sébastien Vahaamahin, deen an der 49. Minutt vum Terrain geflunn ass. An Ënnerzuel ass Frankräich ëmmer méi ënner Drock geroden, a Wales konnt d'Iwwerzuel äiskal ausnotzen. Wales steet domatt an der Halleffinall.

Fir Frankräich, ass et eréischt déi drëtte Kéier an der Geschicht, dass déi franséisch Rugby-Nationalekipp net an enger Halleffinall bei enger WM steet.

Géigner vu Wales an der Halleffinall ass Südafrika. Si konnten sech hirersäits an engem eesäitegem Match géint Japan um Enn mat 26:3 duerchsetzen.

E Samschdeg schonns huet Neiséiland géint Irland an England géint Australien gewonnen. Déi 1. Halleffinall gëtt de 26. Oktober gespillt, dëst mam Match England - Neiséiland. De 27. Oktober spillen da Wales géint Südafrika.