E Freideg ass d'Mandy Minella zu Tyler am US-Bundesstaat Texas an der Aachtelsfinall ugetrueden. U selwechten Dag gouf och d'Véierelsfinall gespillt.

Hir Géignerin an der Véierelsfinall hei war d'Giuliana Olmos. Déi 26 Joer al Mexikanerin steet an der Weltranglëscht op der Plaz 350 an ass domat 181 Plaze méi schlecht klasséiert wéi d'Lëtzebuerger Nummer 1.

An d'Lëtzebuergerin ass e Freideg dann och ganz gutt an de Match erakomm an esou konnt si sech den éischte Saz souverän mat 6:1 sécheren.

Am zweete Saz hat d'Spillerin vun der Spora du méi Schwieregkeeten an huet dëse mat 2:6 missen ofginn.

Am drëtten an decisive Saz huet d'Lëtzebuergerin dunn awer hir Erfarung gewisen a konnt de Match mat 6:1, 2:6 a 6:1 gewannen a steet domat an der Véierelsfinall, wou si et mat der Amerikanerin Jamie Loeb ze di kréie wäert.

A géint d'Nummer 238 op der Welt huet d'Mandy Minella kuerze Prozess gemaach. War et am éischte Saz, deen d'Lëtzebuergerin mat 6:4 konnt fir sech entscheeden, nach spannend, huet d'Mandy Minella den zweete Saz kloer mat 6:1 dominéiert.

An der Halleffinall waart elo eng weider Amerikanerin mam Danielle Lao. Am WTA-Ranking steet déi 28 Joer jonk Sportlerin op der 190. Plaz an ass domadder knapp 21 Plazen hannert dem Mandy Minella klasséiert. Sollt d'Lëtzebuergerin dëse Match gewannen, trëfft si entweder op d'Alexa Glatch (WTA 423) aus den USA oder op d'Marcela Zacarias (WTA 275) aus Mexiko.