E Samschdeg sinn déi éischt zwee Matcher vun den Aachtelsfinallen an der Coupe de Luxembourg gespillt ginn.

Den Titelverdeedeger Diddeleng hat an den 1/8-Finalle vun der Coupe de Luxembourg am Futtball e Samschdeg den Owend keng Problemer mat Munneref an huet sech kloer mat 4:1 duerchgesat. Am zweete Match vum Owend gouf et eng Iwwerraschung. Wolz huet d'Jeunesse nämlech mat 3:0 eliminéiert. Bei deenen Escher leeft et deemno och no der Entloossung vum Trainer Nicolas Huysman net wierklech ze lafen.

E Sonndeg ass et d'Suite vun den 1/8-Finallen an der Coupe de Luxembourg.

F91 Diddeleng - US Munneref 4:1

Net laang huet et gedauert bis den éischte Gol zu Diddeleng gefall ass. No 8 Minutte war et den Tom Schnell, deen den 1:0 no engem Corner mam Kapp fir den F91 markéiere konnt. Munneref huet sech awer net hänke gelooss a sou war et an der 33. Minutt den Taarmite, dee mat engem Schoss vu lénks aus ronn 20 Meter zum 1:1 ausgläiche konnt.

No der Paus ass dann awer nees d'Lokalekipp a Féierung gaangen. De Stolz huet dem Golkipp mat sengem Schoss aus ronn 20 Meter keng Chance gelooss. Ronn 10 Minutte méi spéit ass et dann zu der virzäiteger Entscheedung komm. De Sinani ass vum Punkt äiskal bliwwen a konnt mat sengem Schoss vun 11 Meter op 3:1 erhéijen. Kuerz viru Schluss konnt de Klapp dann nach de 4:1 markéieren a sou setzt sech den F91 viru ronn 100 Spectateuren net onverdéngt géint Munneref duerch a steet domat an der nächster Ronn vun der Coupe.

© Raoul Michels

FC Wolz - Jeunesse Esch 3:0

Wolz ass gutt an de Match gestart an huet de Favorit vun Esch fréi ënner Drock gesat. No engem Fräistouss vum Osmanovic an der 5. Minutt haten d'Haushären déi éischt geféierlech Aktioun vum Match. Och an den nächste Minutte huet ee gespuert, dass de Gol fir d'Ekipp vu Wolz net méi wäit fort ass, ma no enger Zäit konnt och d'Jeunesse sech déi eng oder aner Chance erausspillen. Eng Minutt virun der Paus ass dann den éischte Gol gefall. Dem Biver säi Schoss vun der rietser Säit gëtt ofgefälscht, sou dass de Sommer am Gol vun der Jeunesse keng Chance huet de Ball ze paréieren. Mat enger verdéngter Féierung fir Wolz ass et also an d'Paus gaangen.

No der Paus ass et dann e Réckschlag fir d'Wolzer Ekipp ginn, wéi de Kouayep no senger zweeter gieler Kaart vum Terrain geflunn ass. Ma och dat huet d'Lokalekipp net zeréckschrecke gelooss a sou war et an der 63. Minutt den Timmermans, deen de Sommer am Gol stoe léisst an op 2:0 erhéije kann. D'Escher Ekipp war genervt an dat huet sech um Sebastien Grandjean op der Trainerbänk bemierkbar gemaach. An der 68. Minutt ass hien mat der zweeter gieler Kaart vum Terrain geschéckt ginn. An der 90. Minutt huet den Osmanovic nach een drop gesat a mat sengem Gol zum 3:0 d'Sensatioun perfekt gemaach.

Coupe des Dames

E Samschdeg war et och d'Suite vun den 1/8-Finallen an der Coupe des Dames.