Mat 5:1 klappt de Racing Stroossen iwwerraschend däitlech. Och Nidderkuer, Déifferdeng an Hesper sinn eng Ronn weider.

E Sonndeg war et d'Suite vun den 1/8-Finallen an der Coupe de Luxembourg am Futtball. Hei gouf et eng Iwwerraschung. Monnerech aus der Éierepromotioun huet d'Fola aus der BGL Ligue eliminéiert. Een Tour weider sinn nach Nidderkuer, de Racing, Déifferdeng, Hesper a Rouspert.

E Samschdeg konnte sech schonn den Titelverdeedeger F91 Diddeleng a Wolz iwwert eng Victoire freeën. Déi Wëlzer haten d'Jeunesse, déi aktuell guer net gutt drop ass, iwwerraschend eliminéiert.

D'Resuméë vun de Matcher um Sonndeg

FC Kielen (D1) - Progrès Nidderkuer (ND) 0:3

FC Kielen (D1) - Progrès Nidderkuer (ND) 0:3
Nidderkuer huet sech schwéier gedoen mee konnt sech schlussendlech awer souverän mat 3:0 duerchsetzen.

De Progrès ass als grousse Favorit an dës Partie eragaangen, an huet och d'Partie perfekt ugefaange mat zwou risegen Occasioune vum Thill a Shala. Duerno hunn d'Spectateure misse bis déi 33. Minutt waarden, fir den éischte Gol am Stade Albert Berchem ze gesinn. De Silaj war et, deen d'Gäscht a Féierung bruecht huet. Tëschenduerch huet den FC Kielen sech och geféierlech gewisen, an et huet net vill gefeelt datt si ee Gol geschoss hätten. D'Enn vun der éischter Hallschent war awer op der Nidderkuerer Säit, déi et awer net fäerdeg bruecht hunn, hiren Avantage ze erhéijen.

Nëmmen 5 Minutten no der Paus ass dëst awer duerch den Tekiela mam 2:0 gelongen. Och dono war Nidderkuer besser an huet mam 3:0 duerch den De Almeida an der 67. Minutt alles kloer gemaach.

© Serge Olmo

Racing-Union (ND) - UNA Stroossen (ND) 5:1

Racing-Union (ND) - UNA Stroossen (ND) 5:1
Schonn no den éischte 45 Minutten hat de Racing de Match entscheet nodeems et mat engem 4:0 an d'Paus gaangen ass.

Et war eng schwaarz éischt Hallschent fir déi Stroossener um Verluerekascht. Zwee fréi Goler vum Tinelli hunn de Racing direkt op d'Spuer bruecht a fir déi Stroossener war dëst natierlech alles anescht wéi optimal. An och dono huet beim Racing villes geklappt sou dat se an der 35. Minutt duerch e Gol vum Mabella op 3:0 gestallt hunn. Se haten dann och nach net genuch sou dat den Tinelli an der 40. Minutt mat engem Hattrick de 4:0 konnt schéissen. An der 45. Minutt krut de Payal nach eng glat Rout Kaart an et gouf Eelefmeter fir de Racing, mee dëse konnt de Simon net eraschéissen.

No der Paus ass et fir d'Stroossen just nach drëms gaangen, sech besser ze presentéieren wéi an der 1. Hallschent an net ganz ënner ze goen. Se konnten an der 54. Minutt duerch een Eelefmeter vum Runser dann och op 1:4 verkierzen. Dono war de Match natierlech laang net méi sou animéiert a Spannung gouf et och keng méi. An der 86. Minutt war et dann awer nach eng Kéier den Tinelli, dee mat sengem 4. perséinleche Gol seng ganz staark Leeschtung gekréint huet.

© Michele Pugliese

US Esch (EP) - FC Déifferdeng 03 (ND) 0:1

D'US Esch war ganz gutt an de Match komm an huet mat vill Tempo gespillt wat déi Déifferdenger iwwerrascht hat. D'Gäscht waren awer äiskal virum Gol a konnten den 1:0 duerch de Leite Pereira no enger vun hiren eenzege Méiglechkeete schéissen.

No der Paus hunn déi Déifferdenger de Match dann dominéiert, mee e weidere Gol sollt hinnen net geléngen. An der 71. Minutt huet de Buch en Eelefmeter just op d'Lat geschoss. An der 80. Minutt war et deen nämmlechtenn deen eleng op de Gol gelaf ass, mee am Golkipper säi Meeschter fonnt huet.

Swift Hesper (EP) - Jeunesse Kanech (EP) 5:0

De Swift huet vun Ufank un den Toun uginn, ouni sech awer konkret Golgeleeënheete kënnen erauszespillen. Dat huet d'Gäscht an d'Partie bruecht an esou hat Kanech déi eng oder aner Chance virum Hesper Gol gelongen. Um Enn vun der 1. Hallschecht war et allerdéngs d'Heemekipp, déi mat enger Féierung vum Punkt aus an d'Paus goe kann. De Babit hat den Eelefmeter verwandelt.

An den zweete 45 Minutten huet Hesper de Kanecher dann awer keng Chance méi gelooss a si praktesch aus dem Stadion geschoss. 2 Minutte ware gespillt wéi den Olivier Marques den 2:0 konnt schéissen. Nëmmen 8 Minutten drop huet de Babit mat sengem 2. perséinleche Gol vum Dag den 3:0 markéiert. Zwee weider Goler duerch de Fréderic Marques (79.') a Perez (84.') hunn de Match dunn endgülteg entscheet.

© Raoul Michels

FC Monnerech (EP) - Fola Esch (ND) 5:3 n.E.

Am groussen a ganzen war d'Fola an der éischter Hallschent di dominant Ekipp ouni allerdéngs all ze geféierlech virum Gol opzetauchen. De Klassenënnerscheed war phaseweis ze gesinn, mee och déi Monnerecher konnte sech kuerz virun der Paus nach e puer Chancen erausspillen. Sekonne virum Pausepëff sinn déi Escher dunn awer nach mat 1:= a Féierung gaangen. De Frere huet ee Fräistouss vum Hadji eragesat.

Monnerech war awer och no der Paus gutt am Match a konnt sech gutt Chancen erausspillen. An der 66. Minutt ass hinnen dann och den 1:1 gelongen. No enger schéiner Flank vum Di Rosa huet de Macedo Goncalves den 1:1 geschoss.

Am Eelefmeterschéissen hu bei der Fola de Caron an de Mersch verschoss a soumat gewënnt Monnerech a steet an der 1/4-Finall.

SC Beetebuerg (D1) - Victoria Rouspert (ND) 0:3

Ouni Goler ass et zu Beetebuerg an d'Paus gaangen. Rouspert hat vun Ufank u vill Drock gemaach a war tëschenzäitlech no drun um éischte Gol. Mat der Zäit stoung d'Lokalekipp hannen awer ëmmer besser a konnt och ëmmer méi dogéint halen a sech vereenzelt och Golchancen erausspillen.

Och no der Paus ass Rouspert déi besser Ekipp bliwwen a konnten elo dann och dës Iwwerleeënheet a Goler ëmmënzen. An der 60. Minutt war et de Valente dee seng Ekipp a Féierung brénge konnt. No 75 Minutten konnt den agewiesselten Weirich mam 2:0 fir d'Virentscheedung suergen a ganz zum Schluss war et dann nach eng Kéier de Weirich, dee mam 3:0 de Match endgülteg entscheet huet.

© Jeff Birsens

D'Resultater am Iwwerbléck

D'Resultater vun der Coupe des Dames am Iwwerbléck