Et ass déi lescht Saison vum Stade Josy Barthel, am Hierscht soll jo deen neie Stadion op der Cloche d'Or opgoen.

Als Futtballsupporter muss ee mëttlerweil fäerten, wann et 3 Deeg um Stéck reent, dass Matcher ofgesot ginn. Op vereenzelten Terrainen am Land kann een d‘Entscheedung, fir d‘Matcher ze annuléieren, verstoen, mä net an engem Stadion wéi dem Josy Barthel.

Wisou elo alt nees en neie Wues am Stadion soll geluecht ginn, ass eng gutt Fro, där mir nogaange sinn. Allerdéngs stounge mir den Donneschdeg de Mëtten op der Areler Strooss virun zouenen Dieren an och iwwert de schrëftleche Wee war et komplizéiert, un Informatiounen ze kommen.

An enger éischter E-Mail un d'Stater Gemeng, fir eng Stellungnam ze kréien, gouf eis matgedeelt, dass si sou séier wéi méiglech géifen op eis zréckkommen. An enger zweeter E-Mail koum d‘Informatioun, dass si eiser Ufro net kënnen nokommen. Op Froen, a wéi enger Präisklass mir eis beweegen a wisou de Wues, deen den F91 geluecht huet, net méi gutt ass oder gutt soll sinn, ginn et also keng Äntwerten.

Wat d'Finanzéierung vum ale Wues ugeet, kruten déi Diddelenger awer an Tëschenzäit eng Äntwert. D'Stater Gemeng iwwerhëlt 30% vun den 230.000 Euro, déi fir de Match géint Nikosia hu missen investéiert ginn.

Den F91 ka sech also op e Remboursement freeën. Mir hätten eis gefreet, e Statement vun der Gemeng Lëtzebuerg ze kréien.