D´Basket-Federatioun war den éischte Verband, deen d'Championnat wéinst dem Coronoavirus ofgesot huet.

En Donneschdeg war de Conseil vun der FLBB iwwer Videokonferenz zesummen an huet decidéiert, dass bei den Hären Esch Champion ass an dass den Titel bei den Dammen un Ettelbréck geet. Déi Responsabel hunn d'Tabell vum 15. Mäerz gekuckt, dat war den Dag wou d'Saison ofgebrach ginn ass.

Konter a Steesel steige bei den Hären of. Iwwerdeems Hesper a Walfer steigen.

Bei den Dammen ass d'Situatioun bësse méi komplizéiert. Wolz wëll net steigen an Hiefenech iwwerleet nach ob se wëllen an d'National 1 opsteigen.

Den CA huet och decidéiert, dass d'Finalle vun der Coupe virum Optakt vun der nächster Saison zu Keel gespillt ginn.

E Statement vum President vun der FLBB Henri Pleimling fënnt een um Site vun der FLBB.

No deene verschiddenen Annoncen, goufen Decisioune vun der FLBB vill op de sozialen Netzwierker kommentéiert. De President vun der FLBB, Henri Pleimling sot, dass ee sech an de leschte Woche vill beroden hätt an dass elo déi richteg Decisioune geholl goufen.

Den Henri Pleimling: Et ass an där Geschicht vill manner ëm de Champion gaangen. Éischter ëm den Op- an Ofstig. Mir sinn ëmmer méi zu der Konklusioun komm, dass mir an deem bestoende Kader, dee mir hunn, an där bestoender Formule, déi mir hunn an déi mir als C.A. net änneren däerfe keen anere Choix hunn, fir déi Saison wéi se bis elo gespillt ginn ass ze validéieren. Well mir sinn der Meenung, dass déi Saison onméiglech ka fir d'Kaz gespillt gi sinn, mee déi ass gespillt ginn mat engem Resultat, mat engem Verdikt an Ergo och Op- an Ofstig an da muss ee just logesch duerchdenken, dass deen éischten och Champion ass.

Extrait Henri Pleimling

Schreiwes vun der FLBB

Am Resumé bei den Hären:

Total League Hären:
Champion: Basket Esch
Ofsteiger an d'Nationale 2: AB Contern + Amicale Steesel

Nationale 2 Hären:
Opsteiger an d'Total League: Telstar Hesper + Résidence Walfer
Ofsteiger an d'Nationale 3: Wolz

Nationale 3 Hären:
Opsteiger an d'Nationale 2: Mamer

Notiz: East Side Pirates hunn den Opstig an d'Nationale 2 refuséiert, dofir bleiwe Munneref an Bascharage (punktgläich) an der Nationale 2.

Am Resumé bei den Dammen:

Dammen Total League:
Champion: Etzella Ettelbreck

Op- an Ofsteiger:
Wolz (1. an der Nationale 2) refuséiert den Opstig, Hiefenech (2.) muss nach eng Entscheedung huelen. Telstar muss dann eventuell décidéieren, op de Veräin bei den Dammen an der Total League bleiwe wëll.

EXTRA: Coupe-Finallen, déi nët konnte gespillt ginn, ginn nächst Saison zu Kayl aplaz vum Super-Cup gespillt, d'Gewënner kréien och ofiziell den "Coupe"-Titel 2019/20.