E Sonndeg war den Olivier Thill iwwerdeems fir 20 Minutte beim FK Ufa am Asaz an de Leandro Barreiro huet mat Mainz de Kierzere géint Leipzig gezunn.

Sonndeg

An der schwedescher Allsvenskan huet de Lars Gerson beim 1:1 géint Malmö 78. Minutte gespillt. Duerch de Remis steet Norrköping elo mat 33 Punkten op der 4. Plaz an der Tabell.

De Vahid Selimovic huet mam OFI Kreta eng 2:1-Victoire géint Lamia geséchert. Dobäi war de Lëtzebuerger de ganze Match am Asaz.

An der russescher Liga huet den FK Ufa mat 0:1 géint ZSKA Moskau de Kierzer gezunn. Den Olivier Thill ass dobaäi an der 70. Minutt agewiesselt ginn, konnt um Resultat awer näischt méi änneren.

Samschdeg

De Vincent Thill gouf bei der Partie tëscht Nacional Funchal a Boavista Porto bei der Lokalekipp an der 68. Minutt beim Stand vun 2:3 agewiesselt. An der 1. Minutt vun der Nospillzäit konnt d'Ekipp vum Lëtzebuerger Nationalspiller mat dem 3:3 ausgläichen.

An der 2. Bundesliga huet den Dirk Carlson mat Karlsruhe mat enger 2:0 Defaite géint Hannover de Kierzere gezunn. De Lëtzebuerger Nationalspiller ass dobäi an der 77. Minutt agewiesselt ginn.

An der zweeter portugisescher Liga huet Benfica B mat 6:0 géint Casa Pia gewonnen. De Marvin Martins ass dobäi réischt an der 90. Minutt agewiesselt ginn.

Freideg

E Freideg den Owend war den Eric Veiga mam UD Vilanfranquense an der zweeter portugiesescher Liga am Asaz. De Lëtzebuerger stoung bei der 4:0-Defaite géint Feirense vun Ufank un um Terrain an huet de ganze Match gespillt. No 2 Spilldeeg steet Vilafranquense elo ouni Punkten op der leschter Plaz.

Tim Hall positiv op de Coronavirus getest

Deemno muss de Lëtzebuerger Nationalspiller, dee fir Gil Vicente a Portugal spillt, bis de 26. September a Quarantän. De Match vu senger Ekipp ass dann och ofgesot, well béid Ekippen, Gil Vicente a Sporting Lissabon, iwwer 30 Corona-Fäll zesummen hunn.