No enger 6:0 Victoire doheem géint den FC Milsami ka Sheriff Tiraspol virzäiteg déi moldawesch Meeschterschaft feieren.

29 Victoiren aus 32 Matcher an dobäi just eng Néierlag sinn der Ekipp vum Sébastien Thill duergaangen, fir de Championstitel a Moldawien ze feieren. Mat 6:0, no Goler vum Kolovos, Castaneda (x2), Bizjak (x2) an Traore, géint den drëtten an der Tabell ass hinnen den Titel net méi ze huelen. De Sébastien Thill gouf an der 46. Minutt agewiesselt.

Nouvellë ginn et dann och vum Lars Gerson. Den Nationalspiller schléisst sech Brann Bergen aus Norwegen un. Hei leeft d'Championnat schonn an et gouf eng éischt Néierlag fir seng nei Ekipp. Domadder ass d'Kapitel Racing Santander no e puer Méint schonn eriwwer, dat och no enger Blessur. No 6 Joer a Schweden an engem kuerzen Optrëtt an der drëtter spuenescher Liga zitt et de Verdeedeger zeréck an den Norde vun Europa.

En Donneschdeg den Owend huet Dinamo Kiew mam Lëtzebuerger Nationalspiller Gerson Rodrigues den Doublé realiséiert. Nodeems d'Ekipp aus den ukrainescher Haaptstad de Championstitel gewanne konnt, hu si elo och d'Coupe gewonnen. An der Finall hu si no Verlängerung mat 1:0 géint Luhansk gewonnen. Den decisive Gol huet den Tsygankov geschoss. De Gerson Rodrigues stoung an der Startopstellung a gouf eréischt an der 118. Minutt ausgewiesselt.

De Freideg den Owend huet den 1. FC Saarbrécken mam Lëtzebuerger Nationalspiller Maurice Deville géint SV Meppen mat 2-0 gewonnen.