Am Match géint Varzim gouf et fir de Lëtzebuerger Nationalspiller dräi weider Punkten.

Sonndeg

An der zweeter portugiesescher Liga konnt sech Casa Pia mat 3:0 géint Varzim duerchsetzen. De Marvin Martins stoung beim Tabellenaachten an der Starteelef a gouf an der 83. Minutt ausgewiesselt.

Den Dirk Carlson stoung no laanger Verletzungspaus nees am Kader vu Karlsruhe. Zu engem Asaz ass et bei der 3:2-Victoire vum KSC géint Holstein Kiel awer nach net duergaangen.

Samschdeg

A Moldawien ass et fir de Sébastien Thill mat Sheriff Tiraspol e Samschdeg de Mëtteg déi nächst Victoire ginn. Bei der 7:0-Victoire géint Dinamo-Auto konnt hie sech direkt zwee Mol als Buteur androen.

Fir den Eric Veiga gouf et mat Vilafranquense an der zweeter portugiescher Liga ee Punkt. Beim 0:0 géint Cova da Piedade war hie fir 78. Minutten am Asaz.

A Griechenland stoung de Vahid Selimovic fir 45 Minutten um Terrain. Den OFI Kreta konnt géint Panetolikos zwee Mol a Féierung goen, spillt um Enn awer nëmmen 2:2 gläich.

Och fir de Maxime Chanot gouf et e Samschdeg ee Punkt mat New York City. Beim 1:1 géint den FC Toronto koum de Lëtzebuerger Defenseur 87 Minutten zum Asaz.

Fir d'Young Boys ass et an der schwäizer Super League eng 5:2-Victoire géint Luzern ginn. De Christopher Martins stoung dobäi déi ganz 90 Minutte fir de Champion fir Bern um Terrain.