Um zweeten Dag vun der Futtball-WM am Katar stoungen e Méindeg déi nächst 3 Matcher um Programm.

Am éischte Match vum Grupp B konnt sech England mat 6:2 géint den Iran duerchsetzen. Um 17 Auer huet Holland am Grupp A d'Partie géint de Senegal mat 2:0 gewonnen an um 20 Auer gouf et am Grupp B e Remis tëscht den USA a Wales.

Futtball-WM Dag 2/Reportage Jeff Kettenmeyer

Grupp A

Senegal - Holland 0:2
0:1 Gakpo (84'), 0:2 Klaassen (90'+9)

Och wann d'Partie an der éischter Hallschent ausgeglach war, haten d'Hollänner an engem bei wäitem net ausverkaaften Al-Thumama Stadium zu Doha déi besser Chancen. De Senegal profitéiert iwwerdeems vun de séiere Sarr an Diatta fir d'Spill no vir. Goler sinn awer keng gefall.

Dat sollt och bis spéit an den zweete 45 Minutte sou bleiwen. Réischt an der 84. Minutt huet de Gakpo mam Hannerkapp den 0:1 geschoss. De senegalesche Goalkeeper huet do net gutt ausgesinn. Och beim zweete Gol vun den Hollänner an der Nospillzäit hat de Mendy net souverän gewierkt.

Grupp B

England - Iran 6:2
1:0 Bellingham (35'), 2:0 Saka (43'), 3:0 Sterling (45+1), 4:0 Saka (62'), 4:1 Taremi (65'), 5:1 Rashford (71'), 6:1 Grealish (90'), 6:2 Taremi per Eelefmeter (90+12)

Déi éischt hallef Stonn vum Match war gréisstendeels vun Ënnerbriechunge gepräägt. Engersäits huet den iranesche Golkipp mat Verdacht op Gehiererschütterung misse behandelt a spéider ausgewiesselt ginn, anerersäits hunn d'Iraner aggressiv verdeedegt a probéiert, de Spillfloss vun den Englänner ze ënnerbannen. Nodeems an der 32. Minutt e Kappball vum Maguire nëmme widder d'Lat goung, huet 3 Minutte méi spéit de jonken Jude Bellingham et no enger flank vum Luke Shaw besser gemaach a mam Kapp den 1:0 markéiert. An der 43. Minutt konnt de Bukayo Saka mat engem flotte Schoss op 2:0 erhéijen, ier de Raheem Sterling an der Nospillzäit vun der éischter Hallschent no enger flotter Konterattack den 3:0 geschoss huet.

Och an der zweeter Hallschent war England déi besser Ekipp an an der 62. Minutt konnt de Saka mat sengem zweete perséinleche Gol op 4:0 stellen. An der 65. Minutt konnt den Taremi, dee beim FC Porto spillt, den éischte Gol fir d'Iraner markéieren. D'Three Lions hunn awer weiderhin dominéiert an de Rashford konnt kuerz no senger Awiesslung de 5. englesche Gol markéieren. An der 90. Minutt huet den Jack Grealish du fir de 6:1 gesuergt. An der 12. Minutt vun der Nospillzäit huet den Taremi vum Eelefmeterpunkt aus fir d'2:6-Schlussresultat aus der Siicht vum Iran gesuergt.

USA - Wales 1:1
1:0 Weah (36'), 1:1 Bale per Eelefmeter (82')

Um Enn war et e gerechte Remis tëscht den USA a Wales, och wa fir d'Amerikaner däitlech méi dra war. An der éischter Hallschent waren d'USA dominant a sinn an der 36. Minutt verdéngt duerch de Weah a Féierung gaangen. An der Suite hunn d'Jonge vum Trainer Gregg Berhalter sech dunn awer vun den ëmmer méi engagéierte Waliser d'Victoire ewechhuele gelooss. An der 82. Minutt huet de walisesche Kapitän Gareth Bale nämlech vum Eelefmeterpunkt aus fir den Ausgläich gesuergt. Deemno bleift et am Grupp B spannend, wat d'Positioun 2 ugeet, wann een dovunner ausgeet, datt d'Englänner no der souveräner Victoire vun haut sech déi éischt Plaz sécheren.

D'Tabellen am Iwwerbléck