E Samschdeg ass d'KO-Phas mat den Aachtelsfinallen bei der Futtball-Weltmeeschterschaft ugaangen.

De Résumé vun de WM-Matcher - Reportage Rich Simon

Direkt zwee KO-Matcher ginn um Samschdeg gespillt. Um 16 Auer waren dat Holland géint d'USA an den Owend um 20 Auer huet nach e vun de grousse Titel-Favoritten Argentinien géint Australien gespillt.

Holland sollt sech mat 3:1 géint d'USA duerchsetzen a spillt an der Véierelsfinall géint Argentinien. D'Ekipp ronderëm de Lionel Messi setzt sech no enger immens spannender a dramatescher Schlussphase mat 2:1 géint Australien duerch.

De Resumé vun deenen éischten zwou 1/8-Finallen

Holland - USA 3:1
1:0 Depay (10'), 2:0 Blind (45+1'), 2:1 Wright (76'), 3:1 Dumfries (81')

RTL

D'USA hu sech vun Ufank un net verstoppt an haten no 3 Minutten déi éischt honnertprozenteg Chance am Match. De Pulisic stoung bemol ganz eleng virum hollänneschem Gol, säi Schoss sollt den Noppert mat enger fantastescher Parad nach oflenken. Kuerz dorop huet den Depay et op der anerer Säit besser gemaach. De Stiermer huet no enger flotter Kombinatioun aus ronn 13 Meter d'Féierung fir d'Elftal geschoss. Robinson a Co ware beméit, ouni sech awer weider geféierlech Chancen eraus ze spillen. Kuerz virun der Paus huet de Blind no Pass vum Dumfries d'Hollänner mat 2:0 a Féierung geschoss.

D'US Boys si wéi och an der 1. Hallschent mat vollem Elan aus de Kabinne komm. Ream a Mc Kennie konnten hier Chancen awer net notzen.  An der Schlussphase sinn d'US Amerikaner dunn awer nach emol eru komm. No Flank vum staarke Pulisic kennt de Wright e bësse glécklech un de Ball a vu sengem Fouss geet dat ronnt Lieder an de Gol. Nëmme 5 Minutte méi spéit sollt de Dumfries awer fir d'Virentscheedung suergen, sou dass de Match um Enn mat 3:1 fir d'Elftal ausgeet. D'Ekipp vum Louis van Gaal kritt et an de 1/4-Finallen mam Gewënner aus der Partie Argentinien - Australien ze dinn.

Argentinien - Australien 2:1
1:0 Messi (35'), 2:0 Alvarez (57'), 2:1 Fernandez (77')

RTL

© AFP

Australien stoung vun Ufank ganz déi hannendran an huet esou de Argentinier d'Liewe schwéier gemaach. Taktik vun den Australier ass awer opgaangen, hat Argentinien bis zu 35 net wierklech eng nennenswäert Chance. Dunn huet awer d'Stonn vum Lionel Messi geschloen. Mat sengem 1. Gol an engem WM KO-Spill huet de Superstar mat engem placéierte Schoss an de lénksen Eck seng Ekipp a Féierung bruecht. Australien huet dat beschten aus hire Mëttele gemaach, sollt awer mam 0:1 an d'Paus goen.

Am 2. Duerchgang ass de Match méi animéiert ginn. Fir d'Éischt sollt den Alvarez an der 57. Minutt no engem einfache Ballverloscht vum Australesche Keeper de Score op 2:0 fir Argentinien eropschrauwen. An der Suite vum Match huet den Trainer vun de Socceroos 5 mol gewiesselt, a senger Ekipp nei Impulser ginn. Mat e bësse Gléck ass dem Goodwin säi Schoss an der 77. Minutt ofgefälscht ginn, an huet esou de Wee an de Gol fonnt. De Uschloss fir Australien. Kuerz dorop hat de Behich no engem Wansinns-Solo den Ausgläich um Fouss leien, de Martinez huet sech a leschter Sekonn tëschent de Ball geworf. De Luck-Punch sollt trotz e puer super Chancen awer net méi geléngen, sou dass Argentinien eng Ronn weider ass.

Den Iwwerbléck vun der KO-Phas

KO-Phas