Fir déi dräi Thill-Bridder war et de Sonndeg en Dag mat gemëschte Gefiller. De Marvin Martins konnt d'Defaite vun Austria Wien net verhënneren.

Sonndeg

An éisträichescher Bundesliga gouf et fir de Marvin Martins an Austria Wien um 8. Spilldag eng 1:2-Defaite bei Altach. D'Austria war wuel a Féierung gaang (5'), mee Altach huet mat zwee séiere Goler (7' a 15') zeréckgeschloen an de Match gedréint. Et war déi zweet Néierlag hannertenee fir d'Ekipp vum Lëtzebuerger Nationalspiller, déi nach ëmmer just fënnef Punkte um Kont huet.

De Vincent Thill a säin neie Veräin Sabah Baku kënne sech iwwer ee Punkt freeën. Um 7. Spilldag gouf et géint den FK Kapaz en 2:2. De Lëtzebuerger stoung an der Startformatioun a gouf beim Stand vun 2:2 an der 73. Minutt ausgewiesselt. Baku ass am Moment Drëttleschten an der Tabell.

Fir säi Brudder ass et nach besser gelaf. Rzeszow huet an der éischter polnescher Liga 2:1 bei Pruszkow gewonnen an domat wichteg Punkten am Tabellekeller gesammelt. De Sébastien Thill stoung quasi de ganze Match um Terrain a gouf beim Stand vun 2:1 kuerz viru Schluss ausgewiesselt.

Den drëtten Thill-Brudder huet mat sengem tierkesche Veräin Sanliurfaspor doheem 0:2 géint Kocaelispor verluer. Den 0:1 ass an der Nospillzäit vun der éischter Hallschent gefall, den 0:2 kuerz no der Paus. Och den Olivier Thill hat de Match um Terrain ugefaangen, gouf awer an der 71. Minutt vum Terrain geholl.

Fir den Anthony Moris an Union St. Gilloise gouf et endlech nees dräi Punkten, no just engem Punkt aus de leschten dräi Matcher. De Club vu Bréissel konnt sech mat 2:0 bei Cercle Bruges behaapten an huet nees Kontakt zum Spëtzentrio.

Samschdeg

Waldhof Mannheim huet sech e Samschdeg de Mëtteg mat engem 1:1 géint Saarbrécken ee Punkt geséchert. De Laurent Jans stoung beim Remis vu senger Ekipp net am Kader.

An der héchster norwegescher Liga ass et fir de Lars Gerson dann eng 2:1-Victoire géint Skeid Oslo ginn. De Lëtzebuerger war bei der Victoire déi komplett 90 Minutten am Asaz.

Fir de Seid Korac gouf et an der schwedescher Allsvenskan eng knapp Defaite géint den FF Malmö, bei där hie vun Ufank un um Terrain stoung.

An der Bundesliga huet sech och Mainz misse mat 1:2 zu Augsburg geschloe ginn. De Leandro Barreiro, deen an der Starteelef vun de Mainzer war, konnt mat senger Ekipp och trotz enger Iwwerzuel an der Schlussphas kee Punkt mat Heem huelen.

De Maxime Chanot huet mat sengem neie Veräin eng weider Victoire gefeiert. Beim 2:1 vun Ajaccio géint den FC Paräis konnt hie souguer den decisive Gol zum 2:1 fir säin Teamkolleeg virbereeden.

Fir de Florian Bohnert gouf et an der Ligue 2 dann eng 0:2-Defaite géint den SCO Angers. Dobäi war hien de ganze Match iwwer am Asaz.

An der 2. däitscher Bundesliga konnt sech den FC St. Pauli virun den eegene Spectateure mat 3:1 géint den FC Schalke duerchsetzen. Den Danel Sinani ass dobäi awer net an den Asaz komm.

Freideg

An der 2. Bundesliga stoung den Eldin Dzogovic net am Kader vum 1. FC Magdeburg, dee sech mat engem 1:1 virun den eegene Spectateuren ee Punkt gedeelt huet.

Fir den Enes Mahmutovic gouf et a Bulgarien e kuerzen Asaz. An der 87. Minutt gouf de Lëtzebuerger Defenseur bei enger 2:1-Féierung agewiesselt a konnt déi dräi Punkten um Enn och sécher iwwert d'Zäit bréngen.

An der 2. Liga an Éisträich huet St. Pölten dann zwee Punkte leie gelooss. Trotz zwou tëschenzäitleche Féierungen ass et géint Admira Wacker um Enn bei engem 2:2-Remis bliwwen, bei deem den Dirk Carlson de ganze Match iwwer am Asaz war.