RTL - BGL Ligue: 4. Spilldag: Péiteng an Déifferdeng mat klore Victoiren, éischt Punkte fir d'Fola

Nom véierte Spilldag hu mat Déifferdeng, Hesper an Nidderkuer dräi Veräiner de Maximum vun 12 Punkten um Konto.

Um 4. Spilldag an der ieweschter Divisioun am nationale Futtball-Championnat hunn no Hesper e Samschdeg den Owend och Nidderkuer an Déifferdeng e Sonndeg hir véiert Victoire an dëser Saison gefeiert.

De Resumé vum 4. Spilldag - Reportage Serge Olmo

De Champion Déifferdeng ass op Munneref mat 4:0 wanne gaangen. No Goler vu Simoes, Trani a Jorginho war de Match no den éischte 45 Minutte schonn decidéiert. Sekonne viru Schluss huet de Brusco mam 4:0 fir de Schlusspunkt gesuergt.

De Progrès war Rouspert mat 2:1 iwwerleeën. De Progrès war kuerz virun der Paus duerch een Eelefmeter vum Bah mat 1:0 a Féierung gaangen. An der 52. Minutt haten d'Gäscht duerch de Marques ausgeglach. Den decisive Gol huet den Daham an der 72. Minutt markéiert.

Péiteng huet eng kloer 4:0-Victoire géint den Opsteiger Beetebuerg gefeiert. Duerch zwee Goler vum Shala stoung et an der Paus 2:0. An der zweeter Hallschent hunn Ali a Fuss fir d'Schlussresultat gesuergt.

Eng weider Victoire gouf et dann och fir Diddeleng. Den F91 huet sech awer alles anescht wéi einfach géint Rodange gedoen. Bei der 3:2-Victoire haten d'Gäscht zweemol ausgeglach, ma déi drëtt Féierung hunn déi Diddelenger dunn awer iwwer d'Zäit bruecht.

D'Fola ka sech iwwerdeems iwwert déi éischt Victoire an dëser Saison freeën. Mat 1:0 huet ee géint Wolz gewonnen.

Dann huet sech Hueschtert duerch e spéiden 2:1 géint Monnerech dräi Punkte geséchert an tëscht Stroossen an dem Racing si keng Goler gefall.

Den Iwwerbléck vun de Resultater mat de Goler
Hueschtert - Monnerech 2:1

1:0 Avdusinovic (14', Eelefmeter), 1:1 Swistek (83'), 2:1 Avdusinovic (88')

Péiteng - Beetebuerg 4:0

1:0 Shala (30'), 2:0 Shala (43'), 3:0 Ali (47'), 4:0 Fuss (70')

Nidderkuer - Rouspert 2:1

1:0 Bah (41'), 1:1 Marques (52'), 2:1 Daham (72')

Diddeleng - Rodange 3:2

1:0 Benkhedim (10'), 1:1 Messuwe (27'), 2:1 Schaus (52'), 2:2 Dzanic (59'), 3:2 Bojic (76')

Fola - Wolz 1:0

1:0 Diakhite (81')

Stroossen - Racing 0:0

Munneref - Déifferdeng 0:4