D’Jennifer, gespillt vum Jessica Chastain, geréiert zu San Francisco eng Fondatioun, déi besonnesch mexikanesch Kënschtler ënnerstëtzt. An dësem Kontext huet si och den Dänzer Fernando kennegeléiert, mat dem si eng passionéiert Relatioun zu Mexico City féiert. Wéi de jonke Mann, interpretéiert vum Isaac Hernández, mat Hëllef vu Passeuren iwwer d’Grenz kënnt, fir mam Jennifer an den USA zesummenzeliewen, fänkt déi weltoppe Fassad vun der amerikanescher Famill awer un ze bréckelen.
De Realisateur Michel Franco wielt fir säin eroteschen Thriller “Dreams” bewosst eng ganz epuréiert Erzielweis, bei där d’Niewecharakteren an de Kontext nëmmen duerch knapp Dialoger erzielt ginn. Dëst geet duer fir de Spectateur an d’Welt vun der pseudo-toleranter Jet-Set ze versetzen an erlaabt et dem Film, sech besonnesch op déi toxesch Bezéiung vun der Koppel ze konzentréieren, déi schliisslech zu enger onerwaarter Wendung féiert. Trotzdeem hätt ee sech bei sou engem aktuelle Sujet awer méi eng déif gesellschaftlech Analys kënnen erwaarden.
