Op der éischter Pressekonferenz vum Atelier zanter 2016 gouf op e musikalesch gefëllt Joer zréckgekuckt an ugekënnegt, wat 2023 op d'Museksfrënn duerkënnt.

Et war déi éischt Pressekonferenz vum Atelier zanter 2016, an dëst aus engem gudde Grond. Et gouf op dat leschte Joer zeréck gekuckt, ee Joer dat musikalesch sou gefëllt war wéi nach ni, ma virun allem gouf annoncéiert, wat 2023 op d'Museksfrënn hei zu Lëtzebuerg duerkënnt. Dozou zielen ënnert anerem véier grouss Open-Air-Concerten um Parvis vun der Luxexpo, 16.000 Ticketen eleng fir de groussen Headliner si vun en Dënschdeg un an der Vente.

Déi éischt Nouvelle vun der Pressekonferenz war: de Covid ass eriwwer, an d'Leit sinn erëm do. Souguer nach méi wéi virdrun. 50.000 Spectateuren hat den Atelier dëst Joer - méi wéi nach virun der Pandemie.

RTL

2023 soll dat genee sou e gefëllte Joer ginn. Et war grouss ugekënnegt ginn, nächste Summer sollen direkt erëm e puer Open-Air-Concerte bei der Luxexpo um Parvis sinn, lescht Joer waren dat déi däitschsproocheg Bands Seed a Fanta 4, dëst Joer soll fir all Goût eppes dobäi sinn: d'Indie Band Arctic Monkeys, déi amerikanesch Musekerin Lizzo an elektronesch Musek vum Paul Kalkbrenner. Wien dann elo de groussen Headliner ass, doriwwer gouf am Virfeld scho vill spekuléiert.

De bekanntste Laachen aus England, sou de Michel Welter, kënnt dann op Lëtzebuerg: de Robbie Williams. 16.000 Ticketen ginn an d'Vente. Zanter dem 9. Oktober ass de brittesche Superstar Robbie Williams nees on Tour a bis den Dezember 2023 ënnerwee. Den 11. Juli kënnt de Popstar am Kader vu senger "XXV Tour" och op Lëtzebuerg. Och hei ass fir en Open-Air de Site bei der LuxExpo erausgesicht ginn.

Virop dann, wat eis d'nächst Joer ënner anerem un Highlighten erwaart.

Déi nei Editioun vum Siren's Call gouf annoncéiert, deen de 24. Juni ass. Den Headliner ass "Phoenix".

D'US-Sängerin Lizzo kënnt den 3. Juli op Lëtzebuerg, respektiv fir en Open-Air-Concert bei d'LuxExpo. D'Rapperin beschäftegt sech an hiren R&B- an Hip-Hop-Songs haaptsächlech ëm Theme wéi Diversitéit a Body Positivity. Mat hirem 2019 verëffentlechte Studioalbum "Cuz I Love" huet si nieft hirem kommerziellen Duerchbroch, och sëllegen Nominéierungen a Präisser kritt, dorënner aacht Nominéierunge bei de Grammy Awards.

De 4. Juli ass et dann un der brittescher Alternative-Rock-Band den Arctic Monkeys. Hei sinn d'Tickete schonn an der Vente.

Da kënnt de Paul Kalkbrenner de 7. Juli nees op Lëtzebuerg. Net an d'Rockhal, wéi bei sengem leschte grousse Concert, ma dës Kéier kënnt den däitschen DJ fir en Open-Air bei d'LuxExpo.

Fir sech bei der Ticket-Vente besser kënnen z'organiséieren, hat den Atelier extra ee Pop-Up an der Hollerecher Strooss opgemaach, dat e Méindeg um 17 Auer am Atelier.

Virverkaf beim Atelier an der Hollerecher Strooss
Schonn um 15 Auer stounge Fans an der Schlaang, fir och ganz sécher hir Ticketen ze kréien.

Vun en Dënschdeg de Moien um 10 Auer u ginn d'Ticketen online a leie bei ëm déi 60 Euro, fir de Robbie Williams muss een dann awer e bësse méi déif an d'Täsch gräifen, déi leien tëschent 130 an 170 Euro, Präisser wéi se an där Liga üblech sinn. Rendez-vous also vum 3. bis den 11. Juli um Kierchbierg.