"Deceptively Quiet" esou heescht der Fotografin Véronique Kolber hir nei Ausstellung an der Galerie Dominique Lang. Et ass eng ganz perséinlech Aarbecht, déi si hei weist, wou de Schlof oder besser gesot d'Schloflosegkeet eng wichteg Roll spillt.
D'Fotoe weisen awer och de komeschen Hallef-Zoustand an deem ee sech befënnt, wann een net wierklech wakereg ass an och net wierklech schléift. Wéi wann ee sech an enger Tëschewelt géing befanne wou ee blockéiert ass an d'Welt ronderëm ee schléift. D'Ausstellung weist dann och de fragillen a verletzlechen Zoustand an deem d'Fotografin deemools war. Ma awer och d'Erënnerunge spillen an dëser Aarbecht eng wichteg Roll. Erënnerungen déi deemno flou kënne si sinn, déi mat Emotiounen iwwerluede sinn oder déi och emol verfälscht sinn.
"Deceptively Quiet" kann een nach bis den 8. November an d'Galerie Dominique Lang zu Diddeleng kucke goen.
