Op Päischtdënschdeg gouf zu Iechternach erëm gesprongen. Beim guddem Wieder huet Sprangpressesioun, déi zum UNESCO-Weltkulturierwe gehéiert, och dës Joer erëm vill Leit ugezunn. Wäisst Iewescht an eng schwaarz oder blo Box, dat ass déi traditionell Tenue. Zemools déi wäiss Faarf huet d'Abtei gutt gefëllt. Ier d'Pressessioun lassgaangen ass, huet de Kardinol Jean-Claude Hollerich nach eng Usprooch gehalen. Hien huet de Leit mat op de Wee ginn, fir de Fridden an der Welt ze sprangen. Dat och, fir dass d'Kanner an d'Jugend an enger friedvoller Welt kënne grouss ginn an dass si eng Aarbecht fannen.
D'Erëffnungsmass vun der Sprangpressessioun 2026 war wéi gewinnt scho Päischtméindeg um 20 Auer. Dës gouf vum Bëschof vu Münster (D), dem Dr. Heiner Wilmer, gehalen. Am Klang vun der Musek gouf dunn en Dënschdegmoien um kuerz virun 10 Auer ugefaange mat sprangen. D'Opdeelung vun de Gruppen ass wéi all Joer déi selwecht, erkläert ee vun de Coordinateuren, Raoul Scholtes: "D'Opdeelung bleift ewéi gewinnt. Mat de Pilgerer aus Waxweiler, déi schonn zu Fouss moies heihinner komm sinn, da kommen d'Fraen an d'Kanner vun Iechternach, d'Nopeschparen, d'Einzelpilger, soss ganz vill Gruppen, déi jo all Joer och matsprangen, an dann den Ofschloss maachen dann traditionellerweis dann och de Lycée an d'Iechternacher Männer."
Hien erklärt och nach: "Et ass immens identitéitsstëftend fir d'ganz Regioun. Dat heescht, wann een hei aus dem Eck ass, dann ass dat eppes, wou een einfach och wëll derbäi sinn. Et ass natierlech eng reliéis Manifestatioun, mee et geet awer och wäit doriwwer eraus. Et ass och eppes fir d'ganz, wéi gesot, fir d'ganz Regioun, wou d'Leit wëllen derbäi sinn.
De kompletten Detail vum Oflaf kënnt Dir hei noliesen.
Dëst Joer ware 35 Gruppe mat dobäi. Fir dass d'Struktur garantéiert ass, gëtt all Grupp vun engem Kommissär ugefouert. Dës guidéieren och d'Museken, erkläert d'Nicole Trapp, déi virdrunner selwer matgesprongen ass, elo zanter puer Joer awer als Kommissärin matgeet: "Als Kommissär gees de mat, fir de Grupp unzeféieren an da gëtt de Bengel héich gehuewen an da fänkt d'Musek un ze spillen."
Den Tour duerch Iechternach gëtt also gesprongen, an dat an enger gewësser Reiefolleg. Do ginn et awer Mëssverständnesser, bedauert de Coordinateur, Raoul Scholtes: "Dat ass ëmmer d'selwecht an et ass souguer net esou, wéi et ëmmer heescht. Am Däitsche ginn et esouguer Spréchwierder: 'Wie bei der Echternacher Spréngprozessioun, dräi nach vorne, zwei zurück'. Mee sou ass et eigentlech net. Dat ass aus engem Mëssverständnis, mee et ass wéi esou dacks: d'Mëssverständnis bleift. Et ass ëmmer, mir sprangen ëmmer nëmmen no vir, heiansdo ass e bësse Stau, mee awer et ass ëmmer nëmmen no vir, sou wéi et soll sinn."
Et ass och esou, wéi déi Pilgerer, déi fir d'éischt matginn et gewise kréien. Dat sinn net nëmme Leit aus Lëtzebuerg. Et sinn och all Joer Sprénger a Pilgerer aus dem Ausland dobäi. Et ass eng Mëschung aus Traditioun a Leit, déi fir déi éischte Kéier mat dobäi sinn. Et gëtt mat 8.000 bis 10.000 Leit gerechent. Dës wier awer eng Zuel, déi vu Joer zu Joer ännere kéint, esou de Raoul Scholtes. Hie betount och, dass d'Unzuel vun de Léit nëmmen niewesächlech wier. All Grupp gëtt vun enger Musek ugefouert, déi meescht maachen dës och schonn zanter Joren, esou dass eigentlech net vill misst geprouft ginn. D'Lidd bleift och all Joer dat nämlecht. Net all Musek-Grupp ass awer identesch, et ginn heiansdo Ënnerscheeder wat d'Instrumenter ugeet.
Sprangpressessioun oder Sprangprëssioun?
Fir jiddereen, deen eventuell irritéiert ass, datt um Site vun der Stad Iechternach d'Sprangpressessioun anescht geschriwwen ass wéi am Lëtzebuerger Online Dictionnaire, huet den LOD och eng Erklärung:
"Bei der Sprangpressessioun op Päischtdënschdeg sprangen d'Participanten op eng Polka-Melodie a Reien duerch d'Iechternacher Stroosse bis bei d'Graf vum hellege Willibrord an der Basilika. D'Originne vun dësem Brauch reechen zeréck bis an d'spéit Mëttelalter. Gespronge gëtt no vir, vun engem Fouss op deen aneren, an d'Leit si mat wäissen Nuesschnappecher, déi un den Enner festgehale ginn, matenee verbonnen. De 16. November 2010 huet d'UNESCO d'Iechternacher Sprangpressessioun op hir Lëscht vun den immaterielle Kulturgidder gesat. Dobäi gouf d'Kuerzform „Sprangprëssioun“ zeréckbehalen – allerdéngs mat engem Treema um -e-, fir bei der Aussprooch ze hëllefen."
