Zënter September goufen dräi Walen un d'Plage vum Departement Finistère ugeschwemmt. Zwee vun de Mamendéiere si verstuerwen, mä ee Wal konnt gerett ginn.

Wéi d'Organisatioun Sea Shepherd en Dënschdeg op Twitter matdeelt, hätte si mat engem Bagger dem 12 Meter laange Finnwal e Kanal zréck an d'Waasser "gebaut".

Mat leschter Kraaft hätt de Walfësch dunn de Wee zréck an d'Mier fonnt. Éischt Versich, de Wal mam Bagger zréck an d'Waasser ze zéien, haten näischt bruecht.

Firwat grad am September esouvill Walfësch un d'Plage ugespullt goufen, ass iwwerdeems net gewosst. Déiereschützer hu festgestallt, datt Déiere staark ënnererniert waren. Méiglech Ursaachen, fir datt d'Déieren op Grond gelaf sinn, si Sea Shepherd no Accidenter mat Booter souwéi d'Opnam vu Plastik oder chemesche Substanzen, déi d'Mënschen an d'Mier geworf hunn.