Musek kann hëllefen, Emotiounen erauszeloossen an domadder schwéier Liewenssituatiounen ze verschaffen.

Duerfir gëtt et och eng speziell Musekstherapie. Eng Partie Refugiéen aus dem Foyer Don Bosco vum Roude Kräiz maachen den Ament bei esou enger Therapie mat.

Zanter bal 3 Joer schafft elo hei am Land d'Gesellschaft fir Musekstherapie mam Roude Kräiz zesummen, fir Flüchtlingen ze hëllefen, traumatesch Erliefnisser ze iwwerwannen. Hei zu Lëtzebuerg ginn et eng 30 Musekstherapeuten. Allerdéngs hu si e schwéiere Stand, well hire Beruff ass net unerkannt.