D'Mënsche si verschidden an dat ass och gutt esou. Bei Mënsche mat Down-Syndrom ginn et Ënnerscheeder an dës Eenzegaartegkeet gëtt den 21. Mäerz gefeiert.

Zanter 18 Méint ass de Joël Schaeffer fir 2. houfrege Papp, mat der Gebuert vum Liz huet sech fir hien a seng Famill esou munches geännert. Scho virun der Gebuert waren de Joël a seng Fra virsiichteg an hunn direkt am Ufank en Test maache gelooss, fir sécher ze goen, dass alles mam Liz an der Rei wier. No der Gebuert gouf festgestallt, dass d'Kand den Down-Syndrom huet.

Nieft sengem Restaurant-Betrib zu Mäertert ass d’Organisatioun, fir alles ënnert een Hutt ze kréie prioritär, am Joël senger Situatioun ass och Teamwork gefrot, esou ass nieft senger Fra och d’Famill hëllefsbereet.

Dem Joël säin Dag geet scho moies fréi lass, géint Mëtteg taucht seng Fra op. Da geet et fir de Joël nom Iessen an de Betrib an d’Laureen iwwerhëlt. Och fir Si war et ufanks net einfach. Nom Iessen an ier et op d’Schaff geet, hëlt de Joël sech awer och nach gären Zäit, fir e bëssen trëppelen ze goen, ee Moment, fir z'entspanen.

Famill, Beruff an eng zweet Duechter, fir de Joël keng allzegrouss Ëmstellung, fir alles ënnert een Hutt ze kréien. Ma och hei gëtt hien ënnerstëtzt vu villen Associatiounen.

Zu Lëtzebuerg ass de Statistiken no eng Gebuert op 600, déi vum Down-Syndrom betraff ass.

Zweeërlee Strëmp um Weltdag vun der Trisomie 21

Mënsche mat Down-Syndrom kréien dacks e Stempel opgedréckt an hir genetesch Spezifizitéite gi gär verallgemengert. Ma Ausgesinn, Intelligenz an d'Mentalitéit sinn, wéi bei all anere Mënsch, genee sou ënnerschiddlech. All Mënsch, egal ob mat oder ouni Trisomie 21, ass eng eenzegaarteg Perséinlechkeet.

Fir dass d'Leit méi offe mat Down-Syndrom sollen ëmgoen, gëtt et den Internationalen Trisomie-21-Dag. Veräiner a Verbänn notzen den 21. Mäerz, fir op hir besonnesch Situatioun opmierksam ze maachen. Déi meescht betraffe Mënschen, ëmmerhi ronn 5 Millioune weltwäit, wëllen nämlech virun allem just eppes: net als krank ugesi ginn.

Tatsächlech si Leit mat Trisomie 21 net krank, ma weise just eng Usammlung vu Krankheetssymptomer. Medezinesch Opfällegkeete kommen dacks vir, wéi zum Beispill Diabetis, eng Séischwächt, auditive Problemer, wéi och gär Häerz-Feeler. Dobäi kommen typesch Mierkmoler wéi breet Hänn a Féiss mat kuerze Fangeren an Zéiwen, e ronnt Gesiicht a schif Aen.

D'Liewenserwaardung war fréier net ganz héich, mä an de leschte Joerzéngte, mat Hëllef vum medezinesche Fortschrëtt, ass dës immens an d'Luucht gaangen. Virun 30 Joer loung d'Liewenserwaardung net iwwer 25 Joer, haut läit se bei 60 an driwwer.

Dass Down-Syndrom keng Krankheet ass, dofir setze sech och mëttlerweil vill betraffe Promis an, wéi zum Beispill dat australescht Model Madeline Stuart, den däitschen Acteur Rolf "Bobby" Brederlow oder den amerikaneschen Entrepreneur Tim Harris.

Den Internationalen Trisomie-21-Dag ass méi wéi just e Feierdag a fir drop hinzeweisen, dass mer all ënnerschiddlech an awer gläich sinn, gëtt et op deem Weltdag all Joer eng witzeg Aktioun: et soll een den 21. Mäerz zweeërlee Strëmp undinn an esou seng Solidaritéit ausdrécken.