D’Elektro-Gamme gëtt weider ausgebaut an deen éischte vollelektresche Skoda presentéiert.
Innovative and intelligent Vehicle
Dat bedeit d’Ofkierzung iV déi all Elektro- an Hybridmodeller vu Skoda droen. Esou och deen neien Enyaq iV, deen – wéi soll et anescht sinn – natierlech zu der SUV-Kategorie gehéiert. Vun 148 bis 306 PS sollen d’Leeschtungsstufe goen, anengems soll den Enyaq mat bis zu 510 km och am Alldag brauchbar sinn. Bausse fällt deen aussergewéinlechen Design souwéi bannen dat neit Raumkonzept mat vill Plaz op.
Nom grousse Brudder Superb kommen dann och den Octavia iV an Octavia iV e-TEC mat Hybrid-Technik. An der Plug-in-Versioun kommen de 1400er TSI an een Elektromotor op 204 PS Systemleeschtung. 60 Kilometer si reng elektresch dran an dat bis zu 140 km/Stonn. An der Mildhybrid-Versioun e-TEC kommen een 3-Zylinder-Bensinner an een 48V Startergenerator an den Asaz. Des Technik soll natierlech virun allem Sprit spueren.
Spritaarm mee net Spaassaarm
Mam selwechten Hybrid-Undriff wéi de Superb kënnt och deen neien Octavia RS iV. 245 PS stinn zur Verfügung, bei nëmme 30 Gramm CO2. D’Fuerleeschtunge sinn trotz allem sportlech; 225 km/Stonn Spëtzt si méiglech, de Sprint op 100 a 7,3 Sekonnen erleedegt. Den Octavia RS behält als Bensinner ouni Hybrid-Undriff déi selwecht Leeschtung vun 245 PS, allerdéngs aus engem 2.0 TSI. Den Diesel leescht 200 PS an ass, wéi de Bensinner och mat DSG ze kréien. Typesch RS sinn natierlech den Aerodynamik-Package, déi charakteristesch Felgen an de sportlechen Interieur.
Fir de Bulli
Feste Bestanddeel vun der Octavia-Gamme ass natierlech och den Octavia Scout. Wéi ëmmer kënnt dee just als Combi mat 15 Millimeter méi Buedemfräiheet an am obligatoreschen a robusten Offroad-Look.
