Net wéi ugeduecht schonn dëst Joer, mä wuel eréischt vum Fréijoer 2023 u wäerten d'Streckeradaren an den Tunnellen op der A7 schaarf gestallt ginn.

Wien an de leschte Méint op der A7 tëscht de Sortie Schëndels a Waldhaff  ënnerwee war, deem dierften d'Aarbechten un den Entrée respektiv Sortie vun den Tunnelle Gousselerbierg, Grouft a Stafelter opgefall sinn. Fir d'Sécherheet an den Tunnellen ze verbesseren, ginn dräi Streckeradaren installéiert. Ma och wann d'Testphas geschwënn uleeft, hunn Automobilisten, déi ze schëtzeg ënnerwee sinn, nach eng kléng Schounfrist.

Et wäert nach bis Fréijoer 2023 daueren, bis een e Protokoll geschéckt kritt, wann een an den Tunnelle Gousselerbierg, Grouft oder Stafelter geblëtzt gouf. Ee genauen Datum, wéini d'Radaren definitiv a Betrib geholl ginn, kann de Mobilitéitsminister François Bausch nach net nennen. Dëst géing dovun ofhänken, wéi laang d'Testphas, wärend där d'Radare kalibréiert ginn, dauert. Wa se bis aktiv sinn, ginn d'Chauffeure vun der Këscht an der Entrée bis bei d'Këscht an der Sortie geblëtzt. Ma och lo sollt ee sech schonn un d'Vitesslimitt halen, esou de Mobilitéitsminister.

"Mir kommunizéieren dat zum richtegen Zäitpunkt. Mä ech mengen, d'Leit sollen sech nach eng Kéier bewosst ginn, datt et wichteg ass, an den Tunnellen déi Vitesse vun 90 Kilometer an der Stonn anzehalen. Dat ass wéinst der Verkéierssécherheet extrem wichteg."Wann d'Vitesse op 70 Kilometer erofgesat gëtt, passt sech de Radar un. Gëtt ee mat manner wéi 100 Kilometer an der Stonn geblëtzt, läit d'Toleranz bei dräi Kilometer, ass ee mat méi wéi 100 Kilometer ënnerwee, läit se bei dräi Prozent. Déi Automobilisten, déi mir no hirer Meenung zu de Streckeradare gefrot hunn, begréissen d'Mesure.

"Prinzipiell fannen ech et eng gutt Saach, wann doduerch d'Sécherheet vun de Leit méi héich gëtt. Anerwäerts muss ech awer soen, ech kommen aus dem Norden a brauch lo schonn eng Zäitche bis an d'Staat."

"Fir mech sinn déi Radaren ok, well d'Vitesse an den Tunnellen ass effektiv ze héich par Rapport zu den normale Stroossen. Ech probéiere meng Vitesse ëmmer anzehalen, well d'Protokoller gi vill ze vill deier."

"Je suis d'accord, même le matin ils roulent comme des fous, même à cinq heures quand je passe. C'est une grosse merde."

E bëssi méi wäit am Norde vum Grand-Duché, laanscht d'N7 bei der Lëpschter-Dällt, gesäit een am Moment iwwerdeems ee Lach amplaz vun engem Radar. Dee fixen Apparat war Mëtt August staark beschiedegt ginn. An e puer Woche soll awer een neie Radar op dës Plaz kommen. Dee Moment kënnt dann och de mobile Radar, deen zanterhier e puer honnert Meter méi wäit südlech op Héicht vum Lieu-dit Closdellt steet, erëm fort.