49 Prozent vun allen Accidenter geschéie bannent Uertschaften, iwwerdeem 34 Prozent ausserhalb op Landstroosse geschéien an 8 Prozent op den Autobunnen.

RTL

Tëscht 2012 an 2021 goufen op eise Stroossen 2.729 Persoune schro bei Accidenter blesséiert, 9.669 goufe liicht blesséiert an 315 Persounen hunn hiert Liewe gelooss. Dat geet aus engem Schreiwes vum Statec ervir.

Verkéiersaccidenter an Zuelen / Rep. Diana Hoffmann

Virun allem bei Accidenter, bei deenen d'Gefier an e Bam rennt, ass de Prozentsaz vun de schwéiere Blessure ganz héich, mat 47 Prozent. Hannendru komme Chute vu Motorrieder, oder Kollisioune mat festen Obstakelen.

RTL

© Statec

Den héchsten Taux u schroen Accidenter gëtt et an de Kantone Réiden, Wolz a Clierf, iwwerdeems et déi meescht Accidenter am Kanton Esch ginn. Esch an d'Stad Lëtzebuerg maachen iwwert d'Hallschent vun allen Accidenter aus. Am mannsten Accidenter gouf et tëscht 2012 an 2021 am Kanton Veianen.

RTL

Den Auerzäite vun den Accidenter no, hu sech déi meescht am Beruffstrafic zougedroen. Déi schwéier Accidenter waren am Nomëtten oder tëscht Hallefnuecht a 4 Auer Moies. An der Moyenne ware schwéier Accidenter am heefegsten an de Méint vun Abrëll bis September geschitt.

RTL

Bei de schroen, respektiv déidlechen Accidenter, ass d'Vitess nach ëmmer Ursaach Nummer 1, mat 27 Prozent. A 14 Prozent vun de Fäll ass et Alkohol um Steier, grad ewéi Accidenter am Zesummenhang mat Foussgänger. An 11 Prozent rabbelt et, well d'Virfaart net respektéiert gouf.

RTL

Bei den déidlechen Accidenter ass dann och erschreckend ze gesinn, dass an 33 Prozent vun de Fäll de Chauffer, respektiv de Passagéier deen ëm d'Liewe komm ass, net ugestréckt war.

Fraen hunn éischter de Reflex sech unzestrécken (92 Prozent) géintiwwer 84 Prozent bei de Männer.

RTL