D'nächst Woch gëtt e weidere fixe Radar zu Bäreldeng installéiert. Et kënnt dann och nach e Radar op Sëll.

Dat huet eis de Mobilitéitsministère op Nofro hi confirméiert. De Radar zu Bäreldeng kënnt an d'Briddeler Strooss an dee gëtt schonn déi nächst Woch installéiert. E kënnt an d'Entrée vu Bäreldeng stoen, do wou Tempo 50 erlaabt ass. D'Gemeng Walfer hat dee Radar gefrot. D'Testphas fänkt am Februar un.

Wou genee deen neie fixe Radar zu Sëll wäert kommen, steet nach net fest. Béid dierften nach am Laf vum Joer a Betrib geholl ginn.

Iwwer 300.000 Protokoller

Eleng 215.000 mol goufen Automobiliste vu fixe Radare geblëtzt, well se liicht ze séier waren, also manner wéi 20km/h méi wéi erlaabt, oder duerch rout gefuer sinn, wat alles mat engem Avertissement taxé vun 49€ bestrooft gëtt.

15.000 Chauffere waren iwwerdeems méi séier ënnerwee. Dat waren der méi wéi dräimol souvill wéi nach 2021.

Derbäi kommen 90.000 Vitess-Depassementer, déi mat de mobile Radare registréiert goufen.