Am Europaparlament gouf um Dënschdeg den Owend iwwert d’Handelsofkommes mat Groussbritannien ofgestëmmt.

D’Land war jo nom Brexit den 1. Januar aus dem EU-Bannemaart an der europäescher Zollunioun ausgetrueden. En Ersazvertrag war ofgeschloss ginn, an deem ënner anerem e Verzicht op Douanes-Taxen a Beschränkunge vun der Unzuel vun de Wuere festgehale gi war. Dat Ofkommes gëllt awer nëmme bis zum Enn vum Mount. Mat der Ratifizéierung vum Parlament wier et dann awer dauerhaft gëlteg.

Déi 6 Europadeputéiert, also de Charel Goerens, d’Monica Semedo, de Christophe Hansen, d'Tilly Metz, de Marc Angel an d’Isabelle Wiseler-Lima wäerte mat Jo stëmmen, an sou d’Handelsofkommes unhuelen, wéi si RTL géigeniwwer confirméiert hunn.

D'Kommissiounspresidentin Ursula von der Leyen hat sech schonn am EU-Parlament fir e positive Vott fir den Handelspakt ausgeschwat. Si sot awer och, si géing verstoen, wann sech déi eng oder aner Deputéiert géinge Suerge maachen, well Groussbritannien sech och scho mol net un Ofkomme gehalen hätt.

„Egal wat d’Grënn sinn, mir mussen eis op gemeinsam Léisunge fokusséieren, unilateral Decisioune bréngen ons néirens. An dat ass ee vun de Grënn, wisou d’Ratifizéierung sou wichteg ass“, sot si. Ma och wann de Vott en Enn vun eppes wier, wier et och de Start vun engem neie Kapitel. Mat der Ratifizéierung krit d'EU nämlech elo och d'Instrumenter, déi zum Anhale vun de Verflichtunge vu béide Säite féiere géingen.

Och den Europadeputéierte Christophe Hansen hat sech am EU-Parlament fir e positive Vott ausgeschwat. Et soll ee weiderhi Brécke bauen, well d’Zukunft vun Groussbritannien an der EU ëmmer wäert verbonne bléiwen. Aus dësem Grond géing hie staark recommandéiere fir en Ratifikatioun ze stëmmen. “Et ass déi eenzeg verantwortungsvoll Entscheedung, déi een huele kann, fir eise Business, fir eis Entreprisen, fir eis Bierger. Loosst eis d’Säit ëmdréinen“, sou de Chrëschtdemokrat.

De Chef-Negociateur Michel Barnier seet, de Kooperatiounsgeescht misst onbedéngt erhale bleiwen, well et hätt ee bei wäitem méi Gemeinsamkeeten, wéi Differenzen, déi d’EU a Groussbritannien trenne géingen.

Et wier eng Scheedung, eng Warnung an en Echec vun der Europäescher Unioun, ënnersträicht en enttäuschte Michel Barnier. Dorausser misste Léiere gezu ginn. Et misst ee sech froen, wisou 52 Prozent vun de Britten sech géint Europa ausgeschwat hätten.

De Vott fir dëse Post-Brexit-Deal wäert vun 20 Auer un ofgehale ginn. Mat engem Resultat gëtt awer eréischt fir e Mëttwoch de Moie gerechent.

Interview mam Christophe Hansen

"Géife mer net zoustëmmen, géif et en haarde Brexit". Mat deene Wierder huet de Lëtzebuerger CSV-Europadeputéierte Christophe Hansen nach virum Vott am RTL Interview zu Bréissel d'Konsequenze vun engem negative Vott erkläert. E Freideg wier den Accord dann ausgelaf.

Als Rapporter vun der Handelskommissioun vum europäesche Parlament fir d'Relatiounen tëschent der EU a Groussbritannien sot hien, et wier ee sech duerchaus bewosst, datt den Accord net ideal ass, déi bescht Optioun wier gewiescht, wann d'Britten an der EU bliwwe wieren. Dofir nennt hien den Accord, déi zweetbescht Optioun, eng Optioun, duerch déi de brittesche Premier awer kee Blankoscheck géif kréien, am Contraire.

"Ënnert deem heiten Handelsaccord hu mir elo e richtege Levier, fir Drock op si ze maachen. Mir kënnen zum Beispill Sanktioune verhänken. Zum Beispill wa si sech elo net un den Nordirland-Protokoll halen an do eesäiteg Decisiounen huelen, déi se eigentlech misste mat eis ofschwätzen. Da kënne mer Tariffer op den Importatiounen erhiewen, mer kënnen awer och Quoten fir verschidde Produite festleeën. Domadder hu mer méi Levier fir Drock op si ze maachen, fir datt se sech un dat halen, wat se ënnerschriwwen hunn."

Mam Accord sollten zwar negativ Konsequenzen op den Handel verhënnert ginn, an awer ginn et der. Op béide Säite sinn d'Exporter erofgaangen. Eurostat no gouf et am Januar an am Februar e Minus vun 20 Prozent bei den Exporter aus der EU a Groussbritannien, bei de Produiten, déi Groussbritannien an d'EU exportéiert, war et esouguer eng Baisse vu 47 Prozent.

"Dat huet och domadder ze dinn, datt déi Digitalisatioun vun deenen neie Prozesser am Ufank nach net richteg fonctionéiert huet. Et sinn och vill Betriber, déi hu scho virum Brexit Stocke gemaach. Et muss een elo kucken, wéi sech dat ausbalancéiert, mä et ass natierlech méi schwiereg, fir z'exportéieren, an et gëtt och méi deier. Den Handel huet gelidden an e wäert och nach leiden."

Et misst een elo emol deene verschiddene Mechanismen Zäit ginn, fir ze gräifen, ënnersträicht de Christophe Hansen, deen optimistesch ass, datt dann den Impakt op den Handel och nach ka reduzéiert ginn.

Den Handelsaccord wier sécher awer sécher net gläichzesetze mat enger Memberschaft am europäesche Bannemaart.