D'Walt Disney Company an eng Rei aner Entreprisen hunn Annoncen op X zeréckgezunn, nodeem si dem Elon Musk, de CEO vun der Plattform, virgeworf haten, am November 2023 en antisemittesche Bäitrag ënnerstëtzt ze hunn. D'Behaaptungen doriwwer, dass dëse Réckzuch e Boykott ausgeléist hätt an Disney Millioune vun Abonnente kascht hätt, si falsch.

RTL

© AFP

Weider Beispiller vun dëser Behaaptung waren op XFacebook an TikTok an diverse Sproochen am Ëmlaf.

Se kommen nodeem de Musk de 15. November e Bäitrag ënnerstëtzt huet, an deem et heescht, dass jiddesch Communautéiten en "dialekteschen Haass géint Wäisser" pushen. Dëse Statement huet eng Well vun Departe vun de groussen Annonceuren op X ausgeléist - dorënner Disney, Apple, Comcast an IBM, déi dem Musk virgehäit hunn, eng antisemittesch Konspiratiounstheorie erëmzeginn.

De Milliardär huet sech fir de Bäitrag entschëllegt an huet op dës Géigereaktioun an engem Interview mat dem Kolumnist Andrew Ross Sorkin um New York Times DealBook Summit dorop reagéiert. An enger grousser Tirade huet de Musk de CEO vun Disney, de Bob Iger, dorop higewisen, hien hätt e Feeler begaangen an huet d'Annonceure, déi sech vun X distanzéiert hunn, der "Erpressung" beschëllegt (hei archivéiert).

Et gëtt awer kee Beweis, dass d'Entscheedung vun Disney d'Zuel vu senge Streaming-Abonnente beaflosst huet. D'Statistiken, déi online gedeelt ginn, stame vun enger satirescher Websäit mam Numm Dunning-Kruger Times.

"Alles op der Säit ass Fiktioun", heescht et an enger Erklärung op der Internetsäit (hei archivéiert).

D'Dunning-Kruger Times ass Deel vun America's Last Line of Defense, engem Netzwierk vun Internetsäiten, déi "falsch Geschichten a Falschmeldunge verëffentlechen, déi dacks fir boer Mënz geholl ginn", sou NewsGuard, eng Entreprise, déi d'Glafwierdegkeet vu Websäite bewäert.

D'Säite gi vum Christopher Blair bedriwwen, deen der AFP am Joer 2020 sot, dass "Bestätegungs-Bias" Mënschen dozou bréngen, d'Artikelen ze gleewen an ze deelen.

Obwuel Disney+ zënter sengem Boom wärend der Pandemie e Réckgang bei den Abonnenten erlieft huet, gëtt et keng Beweiser dofir, dass de Streaming-Déngscht 23 Millioune vun hinne verluer huet.

Den neiste Finanzbericht vun Disney koum den 8. November eraus, éier d'Entreprise hir Annoncë vun der Plattform X zeréckgezunn huet. Dem Dokument no huet Disney 112,6 Millioune Kär-Abonnenten - virun zwee Joer waren et der 118,1 Milliounen (hei archivéiert).

Baséierend op der Publikatioun vun de Rapporten am leschte Joer (hei archivéiert) kéint den nächste Bericht am Februar 2024 erschéngen.

D'AFP huet Disney fir e weidere Kommentar kontaktéiert, krut awer keng Äntwert.

Dësen AFP-Artikel gouf vun RTL op Lëtzebuergesch iwwersat.