De Wladimir Putin huet am Februar 2024 an engem Interview mam fréiere Fox News-Moderator Tucker Carlson eng Rei Sujete kommentéiert, dorënner d'Ukrain an déi international Diplomatie. Awer Notzer vu sozialen Netzwierker an Internetsäiten deele falsch Zitater vum russesche President iwwer d'US-Grenzsécherheet, de President Joe Biden an de fréiere President Obama.

Déi angeeblech Äntwert op d'Fro, ob de Putin d'Evenementer un der südlecher US-Grenz suivéiere géif, ass och op Instagram am Ëmlaf an huet 25.000 Likes gesammelt. Ënner anerem de Kari Lake, e fréiere republikanesche Presidentschaftskandidat am Bundesstaat Arizona, deen elo fir den US-Senat kandidéiert, huet dëse Post op der Plattform X, fréier Twitter, gedeelt.

RTL

© AFP

RTL

© AFP

Eng Internetsäit, déi behaapt huet, eng Transkriptioun vun engem "Bommen"-Interview wär dräi Deeg virum eigentlechen Interview diffuséiert ginn, huet de Putin mat de Wierder zitéiert: "Den Joe Biden weess vläicht net emol, wat lass ass. Hie kann net verstoen, wéi héich d'Sanktioune géint Russland sinn."

Awer de Carlson huet keng Auszich aus sengem kontroversen Interview publizéiert, éier en den 8. Februar diffuséiert gouf - an d'Zitater an de Bäiträg schénge keng offiziell Transkriptioun vum Kreml ze sinn, déi dem Putin seng Äntwerten op Englesch iwwersetze sollen (hei archivéiert).

De Putin huet de Biden just kuerz ernimmt a sot: "Ech ka mech net erënneren, wéini ech mat him geschwat hunn."

De russesche President huet op d'Migratiounsproblemer un der amerikanesch-mexikanescher Grenz ugespillt an huet proposéiert, Washington sollt d'Situatioun an de Grëff kréien, amplaz sech ëm d'Ukrain ze suergen. Awer hien huet net déi Remarke gemaach, déi an de sozialen Netzwierker zitéiert ginn.

"Dir hutt Problemer un der Grenz, Problemer mat der Migratioun, Problemer mat der Staatsverscholdung - méi wéi 33 Billiounen Dollar. Dir hutt näischt Besseres ze dinn, also sollt Dir an der Ukrain kämpfen?", sot de Putin. "Wär et net besser, mat Russland ze verhandelen?"

De Krich an der Ukrain huet de gréissten Deel vum Interview ageholl. De Putin huet eng ausféierlech Erklärung op d'Positioun vu Moskau ginn a sot dem Tucker Carlson, de Weste sollt verstoen, dass et "onméiglech" wär, Russland ze bezwéngen.

De Putin sot och, dass en Deal iwwer den inhaftéierte Journalist vum Wall Street Journal, dem Evan Gershkovich, "erreecht ka ginn", ouni weider op Zougeständnesser anzegoen.

Dësen AFP-Artikel gouf vun RTL op Lëtzebuergesch iwwersat.