Weist dëse Video franséisch Zaldoten zu Odessa?

E Video, deen Enn Abrëll diffuséiert gouf, behaapt, d'Arrivée vu franséischen Zaldoten an der ukrainescher Stad um Schwaarze Mier ze weisen. Dat stëmmt awer net, de Video gouf virun Abrëll a Polen gedréint a weist kee Material, dat vu Frankräich benotzt gouf. Déi offiziell Positioun vu Paräis ass, Kiew ze ënnerstëtzen, ouni Russland direkt géintiwwerzetrieden.

"De ganze Weekend iwwer si Rumeuren a Videoen iwwer d'Arrivée vu franséischen Zaldoten zu Odessa an der Ukrain am Ëmlaf. Ass dat wouer? Sinn eis Deputéiert a Senateuren informéiert?", freet sech de Silvano Trotta op der Plattform X. Den Trotta seng Uschëllegunge ware schonn dacks Géigestand vun AFP-Faktenchecken (wéi hei, hei an hei), zum Beispill hat hien e Video gedeelt, an deem Militärcamionen Ekipement op enger anonymmer Route transportéieren. An der Beschreiwung steet op Englesch "Déi éischt franséisch Truppe kommen zu Odessa un!".

"Franséisch Truppe sinn zu Odessa an der Ukrain stationéiert", schreift en aneren Internetuser op Facebook an deelt eng Foto aus dem selwechte Video an e Link, deen op d'Säit "Hal Turner Radio Show" féiert, déi reegelméisseg Desinformatiounen deelt, wéi een zum Beispill an diversen AFP-Artikele liese kann (wéi hei, hei an hei).

De Video gouf aus dem Interieur vun engem Gefier hannert der Scheif opgeholl. Dat kann een unhand vum Wischer erkennen an unhand vun eppes, wat en Doftbeemche schéngt ze sinn.

De Video dauert ongeféier 20 Sekonnen, wärend deenen een dräi Militärcamione mat zwee klenge Panzeren an ee Camion mat enger Metallstruktur, déi un eng Startramp erënnert, gesäit. Am Hannergrond, an tëschent de Camionen, déi laanscht fueren, gesäit een Haiser, Beem a Stroummasten. Uewen op dem Bild steet an englescher Sprooch, dass "déi éischt franséisch Truppen zu Odessa ukommen". Och den Datum vum 21. Abrëll 2024 ass ze gesinn.

D'Strooss ass am Bau, wéi d'Stroosseschëlter weisen, an et schéngt, dass de Video aus dem Interieur vun enger Baumaschinn opgeholl gouf; déi giel Karosserie ass ze erkennen. Déi lescht Sekonne vum Video weisen eng Kaart vun der Südukrain, op där eng Publikatioun op X vun der Journalistin vum Polit-Magasinn Politico, der Lara Seligman, ze gesinn ass, dee keen direkte Bezuch zu Frankräich huet, well e sech op d'US-Hëllef fir Kiew bezitt (hei archivéiert), iwwer déi d'Parlamentarier an den USA ofgestëmmt hunn.

Am Hannergrond verséchert eng Stëmm: "Haut hu mir e Bericht kritt, dass déi éischt 1.000 franséisch Zaldoten an der Regioun Odessa agetraff sinn, an héchstwarscheinlech wäert an den nächsten Deeg en zousätzleche Corps vu franséischen Zaldoten an der Regioun ukommen. Natierlech ginn 2.000 Zaldoten net duer, mee 2.000 Zaldote ginn duer, fir e puer ukrainesch Zaldoten ze befreien, déi weider duerno un d'Front geschéckt kënne ginn."

Polnesch Strooss

Duerch eng ëmgekéiert Billersich mat Google Lens konnt d'AFP dëse Video bis zu senger Publikatioun op Facebook, den 20. Mäerz 2024, zeréckverfollegen. Dat war also ee Mount virun der supposéierter Arrivée vu franséischen Zaldoten zu Odessa.

Am Géigesaz zum virale Video enthält dëse keng iwwerpecht Bildbeschreiwung a keng Landkaart vun der Ukrain mat dem Verweis op d'Publikatioun vun der Politico-Journalistin um Enn.

De Kont, deen de Video gedeelt huet, seet net, wou a wéini en opgeholl gouf, a säi Profil gëtt keng weider Informatiounen iwwer d'Lokalisatioun.

Sécher ass just, dass den Notzer Norichten op Polnesch deelt. Duerch eng Sich op Google no sengem Numm krut d'AFP duerch eng Resultat-Virschau onsiichtbar Informatiounen iwwer seng Säit. Et gëtt ee gewuer, dass hien zu Elk, enger Stad am Oste vu Polen, gelieft huet.

Am Video konnten d'AFP-Ekippe vu Paräis a Warschau unhand vun enger Rei markanten Elementer den Dréiuert genee bestëmmen.

Fir d'éischt goufen d'Immatrikulatiounsplacke vun de Militärcamionen iwwerpréift. Se si verschwommen a schwéier ze liesen, awer et ass méiglech ze erroden, dass déi vun de Camion 2 an 3 (an der Reiefolleg, an där se opdauchen) allebéid mat de Buschtawen "UG" ufänken, duerno komme fënnef Zifferen.

Am Verzeechnes vun der polnescher Immatrikulatioun stinn d'Buschtawe fir déi polnesch Arméi. De Buschtaf "U" bezeechent e Militärgefier, den nächste Buschtaf steet fir seng Kategorie.

Bei der Google-Sich no "polish military trucks" kann een eng Rei Fotoe vu Camione vun der polnescher Arméi fannen, zum Beispill op de follgende Verkafssäite fir Fotoen, déi e Camion vun der Arméi an engem Ostséihafen am Juli 2023 oder an der Stad Sanok am August 2023 weisen. Domat gëtt d'Hypothees ënnermauert, dass et sech ëm polnescht Material handelt (Links hei an hei archivéiert).

Dat zweet optescht Element an dësem Video: E puer Mol gesäit ee virun den Haiser e Plakat, bei deem et sech ëm eng Plakatwand oder e Walplakat handele kéint, wat plausibel ass, well de 7. an 21. Abrëll Kommunalwalen a Polen waren.

Den AFP-Büro zu Warschau huet d'Walkampfekipp vum Buergermeeschter vun Elk, der Stad, aus där angeeblech den éischte Video vum Militärkonvoi diffuséiert gouf. Den Andrzej Babicz, Member vun der Walcampagne vum Tomasz Osewski, Gewënner vun de leschte Kommunalwalen am Abrëll, huet confirméiert, dass et sech ëm d'Plakat vum Buergermeeschter handelt (Link hei archivéiert).

Den Informatioune vun der AFP-Ekipp a Polen gëtt et um Militärterrain ronderëm d'Stad Elk, an déi siichtbar Aarbechten am Video kéinten eng Baustell op der Strooss 65 beim Duerf Wityny, nërdlech vun der Stad, weisen.

Den Asaz vum Tool "Street View" vu Google Maps ënnermauert dës Hypothees. Op den Opnamen aus dem Joer 2019 sinn trotz der viller Vegetatioun déi selwecht Haiser, de Stroummast an d'Buedemmarkéierung fir e Busarrêt ze erkennen (Link hei archivéiert).

En Dënschdeg, den 23. Abrëll, zwee Deeg no dem zweete Walgang vun de Kommunalwalen, huet d'Ekipp vum Buergermeeschter vun Elk d'Plakater erofgeholl an huet der AFP eng Foto vun der Plaz geschéckt, op där d'Plakat houng.

Hei gesäit een dat selwecht Gebai, Plakat an de selwechte Bam, souwéi de Stroummast, dee mat engem Storchennascht beluecht ass.

All dës Indicë loossen d'Konklusioun zou, dass de Video tatsächlech an der Géigend vun der Stad Elk gedréint gouf an net zu Odessa an der Ukrain.

Material net mat der franséischer Arméi kompatibel

Doriwwer eraus ginn déi verschidde Materialien, déi op dem Bild ze gesi sinn, net vun der franséischer Arméi benotzt.

De Mercedes-Benz-Camion (den zweeten am Video) ass en Zetros 6X6 Modell. E steet net op der Lëscht vun de Logistikgefierer vun der franséischer Arméi (Link hei archivéiert). Dogéint gëtt e vun der polnescher Arméi benotzt, wéi dës verschidde polnesch Informatiounssitte beleeën (Links hei an hei archivéiert).

Dat selwecht gëllt fir den drëtte Camion, en Iveco Trakker, deen och net op der Lëscht vun de Gefier, déi Frankräich benotzt, steet. Am Géigesaz dozou fënnt een de selwechte Camion op dësem Site erëm, dee sech mat militäreschen Noriichten aus Polen beschäftegt (Link hei archivéiert).

Ausserdeem transportéiert den Iveco-Camion Ausrëschtung, déi och nach ni vun der franséischer Arméi kaaft gouf. Et handelt sech ëm e Camion ZIL 131, dee fir den "Transport an d'Luede vu Rakéite" vum Buedem-Loft-Rakéitesystem 2K12 KUB, deen "an den 1960er-Joren entwéckelt a vun der UdSSR an anere Länner vum Warschauer Pakt" benotzt gouf. Sou heescht et an dësem polnesche Militärmusée (Link hei archivéiert).

De Warschauer Pakt, deen 1955 gegrënnt an 1991 opgeléist gouf, war eng Militärallianz vun de Länner vum Sowjetblock an huet als Géigepol zur Militärallianz vun de westleche Länner, der 1949 gegrënnter Nordatlantik-Pakt-Organisatioun (NATO), fungéiert (Link hei archivéiert). Frankräich war Member vun der NATO an net Member vum Warschauer Pakt, am Géigesaz zu Polen (dat mëttlerweil der NATO bäigetrueden ass).

Ried, déi dem Emmanuel Macron zougeschriwwe gëtt

D'Publikatiounen an de sozialen Netzwierker iwwer d'Entsende vu franséischen Truppen op Odessa spigelen d'Äusserungen erëm, déi d'Dageszeitung "Le Monde" dem President Emmanuel Macron de 14. Mäerz an engem Artikel iwwer d'Entwécklung vum Positionnement vum franséische President géintiwwer Russland zougeschriwwe ginn (Link hei archivéiert).

"Wéi och ëmmer, am nächste Joer wäert ech Leit op Odessa schécken", sot de President Aussoen no, déi an der Zeitung genannt ginn, déi ni vum Elysée confirméiert goufen. Enn Februar hat hien ëffentlech deklaréiert, dass d'Entsende vu westlechen Truppen an d'Ukrain net ausgeschloss dierft ginn.

Dës Deklaratioun huet en diplomatesche Wendepunkt duergestallt, well Frankräich zënter enger Rei Joren an am Ufank vun der Invasioun am Joer 2022 ëmmer nees Erklärungen ofginn huet, fir den Dialog oprechtzëerhalen an als Vermëttler opzetrieden. Awer "mir wäerten ni an d'Offensiv goen, nimools d'Initiativ ergräifen. Frankräich ass eng Kraaft vum Fridden", hat den Emmanuel Macron de 14. Mäerz op der Tëlee verséchert (Link hei archivéiert).

Dës franséisch Positionéierung huet dozou geféiert, dass nach méi intensiv versicht gëtt, Desinformatiounen iwwer déi franséisch Krichspolitik ze streeën, déi an der Reegel vu russeschen Telegram-Kanäl initiéiert ginn, ier se an déi franséisch oder déi westlech Sphär gespullt ginn, wéi d'AFP gemellt hat (Link hei archivéiert).

Dësen AFP-Artikel gouf vun RTL op Lëtzebuergesch iwwersat.