D'Ausgangsspär gëllt fir op d'mannst 4 Woche vun owes 9 bis moies 6 Auer. Eng Verlängerung bis den 1. Dezember ass awer eng Optioun.

Um 19.55 Auer e Mëttwoch den Owend, virun den Neiegkeeten also, huet sech de franséische Staatschef Emmanuel Macron eng éischte Kéier zanter Mäerz nees un d'Bierger vu sengem Land adresséiert, fir de Point wéinst der Corona-Kris ze maachen. Eng Situatioun, déi sech och a Frankräich an de leschte Wochen nees zougespëtzt huet.

A Frankräich gëllt da vun e Samschden un erëm eng partiell Ausgangsspär, dat sot de President Emmanuel Macron e Mëttwoch den Owend an engem Tëleesinterview.

D'Ausgangsspär gëllt vun owes 9 bis moies 6 Auer, dat an der Regioun île de France an an 8 weidere Metropolen. Dat si Grenoble, Lille, Lyon, Aix Marseille, Montpellier, Rouen, Saint-Etienne an Toulouse. Wie sech net un dës Moossnam hält, muss eng Strof vun 135 Euro bezuelen, am Fall vun enger Recidive kascht et 1.500 Euro. D'Ausgangsspär soll elo mol 4 Wochen unhalen, se kann awer jee no Situatioun, bis den 1. Dezember verlängert ginn.

Dat bedeit notamment, datt um 9 Auer Owes alleguer d'Restauranten, d'Caféen, d'Theateren, d'Kino a soss Commercë mussen zoumaachen an datt een sech dann op den Heemwee muss maachen.

Den Emmanuel Macron huet ënnerstrach, datt et keng Privatsaach ass, ob ee sech mat Covid-19 ustécht oder net:

Emmanuel Macron

18 bis 20 Millioune Mënschen si vun dëser Moossnam betraff. Et ass awer kee komplett Zirkulatiounsverbued. Et dierf een och no 9 Auer Owes nach virun d'Dier, wann een zum Beispill muss schaffen oder wann een eng Urgence huet. D'Police mécht Kontrollen an et gi wéi gesot Strofen beim Net-Respektéieren vun der Ausgangsspär.

Den Emmanuel Macron huet ënnerstrach, datt een net d'Kontroll iwwert de Virus verluer huet, mä datt een awer an enger Situatioun ass, wou een sech Suerge mécht. Et géif kee Grond fir ze panikéieren, allerdéngs misst een elo aktiv ginn.

© Screenshot BFM TV

Iwwerdeems sinn d'Spideeler an der Ile-de-France opgefuerdert, fir 30% vun den Acten ze deprogramméieren déi net dréngend sinn. D'Doktere warnen, datt déi annoncéiert Ausgangsspär réischt a 14 Deeg, 3 Wochen en Impakt hätt. Et misst ee wëssen, datt een an zwou Wochen tëscht 800 an 1.000 Patienten an der Reanimatioun an der Ile-de-France wäert hunn. Bei enger Kapazitéit vun 1.200 Better.

Bis ewell hunn zu Paräis an anere Groussstied ënner anerem Baren, Caféen a Fitnessstudioe missen zoumaachen.

Kleng Stied a Frankräich hate wärend der éischter Corona-Well am Fréijoer eng temporär Ausgangsspär owes verhaange kritt, wéi et am Zweete Weltkrich de Fall war. Aktuell huet esou eng Mesure just am franséische Guayana gegëllt, dat u Brasilien grenzt. Do dierfen d'Bierger tëscht Mëtternuecht a 5 Auer moies net aus hiren Haiser.

D'Zuel vun den Neiinfektioune läit a Frankräich zanter 2 Méint däitlech méi héich wéi zum Beispill an Däitschland. Eleng de Weekend gouf et en Dages-Héchststand vu bal 27.000 enregistréierte Fäll. Besonnesch d'Zuel vun den Intensiv-Patienten ass séier geklommen. Kritesch ass et zu Paräis, bis Enn vum Mount erwaart ee sech, dass bis zu 90% vun den Intensivbetter wäerte beluecht sinn.

Fir en Donneschdeg hunn d'Gewerkschaften d'Spidolspersonal zu Paräis zum Streik opgeruff.