Trump-Supporter hunn d'US-Kapitol gestiermt, Tréinegas gouf agesat a 4 Persoune sinn am Ganze gestuerwen. E schwaarzen Dag fir d'USA.

Et war ee Putsch vun de Walverléierer, eng Trump-Rebellioun, een Ugrëff op d'Demokratie. D'Titelen hu sech en Donneschdeg iwerschloen no den Zeenen, déi sech e Mëttwoch den Owend eiser Zäit virum amerikanesche Parlament ofgespillt hunn. Biller, wéi een se soss vu Biergerkricher aus Diktaturen kennt, dat virum geschichtsträchtegen Gebai vum Kapitol vu Washington, dat fir d'Verdeedegung vu Biergerrechter, Fräiheet an Demokratie steet....

An dësem Reportage presentéiert de Petz Bartz de "Film" vun de leschte 24 Stonnen:

De Chaos zu Washington
Et war ee Putsch vun de Walverléierer, eng Trump-Rebellioun, een Ugrëff op d'Demokratie, esou de Petz Bartz as engem Reportage.

Wat war geschitt?

Wärend am Kapitol selwer den Joe Biden als President vum Senat sollt confirméiert ginn, hu sech virun den Dieren eng Partie Demonstrante versammelt. Ugangs hunn d'Trump-Supporter nach friddlech demonstréiert, dunn ass d'Situatioun eskaléiert. E Mëttwoch waren jo och nach Komplementarwalen an Georgia, bei deenen Demokraten d'Majoritéit am Senat kruten.

Wéi et op Twitter a spéider och an de Medie geheescht huet an och confirméiert gouf, huet e Grupp vun Trump-Supporter d'Gebai gestiermt an dobäi och Fënsteren am Kapitol futti geschloen. Dausende vu Leit hunn d'Trape virum Kapitol besat, ganz vill Leit hu sech och fräi am Gebai selwer ronderëm beweegt, riets goung deelweis vu 500 Persounen.

Spéider da koume Biller vu CNN, op deenen ee gesinn huet, dass eng Partie Leit am Gebai festgeholl goufen. Och Tréinegas koum an den Asaz. Weider goufen et Infoen, dass souguer de Parlamentssall selwer gestiermt gouf.

Och Mataarbechter, Politiker a Journaliste waren ze gesinn, déi hektesch a Sécherheet bruecht gi sinn. E Couvre-feu fir Washington gouf decidéiert an d'Nationalgarde mobiliséiert.

Spéider am Owend sinn dann och Biller opgedaucht, op deenen een Demonstranten erkennt, déi virum Kapitol Kameraen, Mikroen a Satellitte vu Journaliste futti maachen, dorënner der AP (Agence presse) a souguer vum däitschen RTL-Grupp. Wéi et heescht goufe  Journalisten vun Trump-Supporter attackéiert an hunn dowéinst hiert Material missten zeréckloossen.

Am Ganze goufen 52 Persoune festgeholl. Et sollen och kleng, selwer gebastelt Bommen a Molotow-Cocktaile fonnt gi sinn. Eréischt no Stonnen hat een d'Situatioun am Grëff an de Kongress konnt nees ufänke mat schaffen.

D'Buergermeeschtesch vu Washington DC Muriel Bowser huet den ëffentlechen Noutstand fir 2 Woche verhaangen, dat heescht bis zur offizieller Amtsaféierung vum Joe Biden.

4 Persoune gestuerwen, 14 Poliziste verwonnt

Wéi CNN gemellt hat, gouf eng Fra ugeschoss. Si ass spéider an engem Spidol un hire Blessure gestuerwen. Wéi et heescht, solle Sécherheetsleit op d'Demonstrantin geschoss hunn. Virdru waren och Biller ze gesi vu Polizisten a Sécherheetsleit, déi mat hire Waffen am Sall vum Senat stoungen an d'Dier bewaacht hunn.

Eng intern Police-Enquête gouf dowéinst lancéiert.

Dräi weider Persoune sinn aus anere medezinesche Grënn gestuerwen. D'Detailer ginn et keng.

14 Poliziste goufe blesséiert, dovunner zwee schwéier.

Massiv Kritik

D'Onroue gi schaarf verurteelt. Dat souwuel vun Demokraten, wéi och vu Republikaner. Awer och international kënnt massiv Kritik: Et wier eng Attack op d’Demokratie, wéi et se an den USA nach ni gouf, sot beispillsweis den Joe Biden. E klenge Grupp vun Extremiste wier um Wierk gewiescht.

De Vize-President Mike Pence huet sech och kloer vun den Täter distanzéiert.

Den Donald Trump gëtt zum Deel direkt responsabel gemaach. Dësen huet sech iwwert d'sozial Netzwierker zu Wuert gemellt. Engersäits huet hien zur Rou opgeruff, anersäits huet hien d'Manifestante formidabel Patriote genannt. Twitter a Facebook hat de Kont vum amerikanesche President doropshi fir 12 Stonne gespaart.

Géint 22 Auer eiser Zäit dann huet den Joe Biden sech zu Wuert gemellt a sech schockéiert gewisen. Hien huet de President Donald Trump dozou opgeruff, nach den Owend selwer op der Tëlee opzetrieden, fir d'Leit ze berouegen an nees d'Demokratie am Land anzeféieren. Hie soll seng Supporter dozou opruffen, Washington direkt ze verloossen.

A genee dat huet den Donald Trump dann och kuerz drop gemaach: