70 Arrestatiounen an dräi Polizisten an 12 Demonstrante koume mat Blessuren an d'Spidol, sou de Bilan vun der Bréisseler Police e Sonndeg den Owend.

Zu Bréissel waren e Sonndeg de Mëtteg zéngdausende Leit op der Strooss, fir géint d'Coronamesuren ze protestéieren.
Estimatioune vun der belscher Police no, wieren et ronn 50.000 Leit gewiescht, déi duerch d'Haaptstad gezu sinn a "Liberté" gejaut hunn.

D'Organisateuren, dorënner "World Wide Demonstration for Freedom" an "Europeans United for Freedom" haten d'Bierger aus aneren EU-Staaten opgeruff, sech hirem Protest géint d'Coronamesuren unzeschléissen. Ënnert de Participanteë waren ënner anerem lëtzebuergesch, polnesch, hollännesch a rumänesch Fändelen ze gesinn. D'Organisateuren hunn dann och vu 500.000 Demonstrante geschwat.

D'Leit hu Pancarte mat Parole géint de belsche Regierungschef Alexander De Croo an d'Luucht gehalen. Si kritiséieren donieft de Corona-Pass, mat deem an der Belsch a villen ëffentleche Strukturen eng Impfung oder en negativen Test nogewise muss ginn. D'Organisateure fuerdere virun allem een ëffentlechen Debat iwwer d'Mesuren.

70 Arrestatiounen a 15 Hospitalisatiounen duerch Ausschreidungen

Wéi d'Maniff eigentlech eriwwer war, hunn eng ganz Rei Demonstranten ugefaangen ze randaléieren an hunn notamment mat Steng, mat Poubellen, mat Knupperten an eigentlech allem wat se sou fonnt hunn ënner anerem op Polizisten an op ee Gebai vum "European External Action Service" geworf.

Donieft goufen och Bränn geluecht ënner anerem an enger Entrée vun enger Metrosstatioun Barrikaden opgeriicht an Autoe beschiedegt. Op enger ganzer Rei Videoen op de sozialen Netzwierker gesäit een dann och reegelrecht Stroossekämpf tëscht Casseuren an der Police.

D'Beamte si mat Waasserwerfer an Tréinegas géint dës aggressiv Casseure virgaangen. Wéi déi belsch Police e Sonndeg den Owend matgedeelt huet, gouf et 70 Arrestatiounen. Dräi Polizisten an 12 Demonstrante goufen an d'Klinick ageliwwert.