Den Nanzeger Procureur huet dëst en Dënschdeg confirméiert. De Lëtzebuerger Parquet wäert d'Affär vun en Dënschdeg un iwwerhuelen.

E Méindeg den 19. September 2022 gouf jo net wäit vun der franséisch-Lëtzebuerger Grenz eng Läich vun enger jonker Fra hannert engem Supermarché zu Mont-Saint-Martin entdeckt.

"Et ginn effektiv Indicen, dass d'Affer déi portugisesch Nationalitéit hat an am Grand-Duché gewunnt a gelieft huet", esou de Parquet op Nofro vu "Contacto" e Méindeg.

Dës Indicë goufen dann elo och en Dënschdeg definitiv confirméiert, esou direkt e puer franséisch Medien. De François Pérain, de Procureur vun Nanzeg, huet op enger Pressekonferenz confirméiert, dass et sech beim Affer ëm eng portugisesch Staatsbiergerin handelt, déi zu Lëtzebuerg gewunnt huet. En DNA-Verglach hätt dëst elo formell confirméiert, heescht et säitens France Bleu. Déi Lëtzebuerger Autoritéite wäerten d'Affär dann och en Dënschdeg de Moien iwwerhuelen, heescht et weider.

De Kierper vun der Fra gouf den 19. September vun engem 16 Joer jonke Jugendlechen fonnt, dat hannert engem ale Supermarché zu Mont-Sain-Martin am Departement Meurthe-et-Moselle. De Proprietär vun engem Café huet doropshin d'Police alarméiert.