An der éischter Sitzung vum Déifferdenger Gemengerot gouf d’Christiane Brassel-Rausch zu der neier Buergermeeschtesch gewielt.

De Roberto Traversini huet e Mëttwoch och als Déifferdenger Gemengeconseiller demissionéiert. Hien huet en entspriechende Bréif eraginn, deen un d'Inneministesch Taina Bofferding goung. Dat huet de Schäffen Tom Ulveling vun der CSV um Ufank vun der 1. Gemengerotssëtzung e Mëttwoch de Moie bekannt ginn.

A huis clos gouf duerno d'Christiane Brassel-Rausch vun déi Gréng zur neier Buergermeeschtesch gewielt, mat 12 Jo-, enger Neen-Stëmm a 5 Enthalungen. Si ass déi 1. Fra un der Spëtzt vun der drëttgréisster Stad vum Land. D'Christiane Brassel-Rausch iwwerhëlt domat d'Successioun vum Roberto Traversini, dee jo an der Suitte vun der Affär Gaardenhaischen als Buergermeeschter zeréckgetruede war.

Déi nei Buergermeeschtesch sot, hir Dier stéing ëmmer op fir Gespréicher. Si sot sech zefridde mam Resultat an all de Bedeelegte Merci:

"Mir hunn am Fong dat widderholl, wat mer zum Deel och schonn an der ëffentlecher Sëtzung gesot hunn. Ech mengen, mir si prett, zesummen hei um Dësch, fir zesummen an d'Zukunft ze goen, mam Koalitiounsprogramm, mat der Zesummenaarbecht, mam Abanne vun der Oppositioun. Natierlech gëtt et eng Majoritéit an eng Oppositioun, dat wäerte mir och net änneren, mä den Dialog soll entstoen, well ech mengen, dass einfach och d'Ufuerderungen un d'Politik mëttlerweil anerer sinn, wéi et soss ëmmer war, an deem wëlle mer, mengen ech, zesummen entgéinttrieden a probéieren, dann, positiv fir dës Stad, fir dës Gemeng an dann och fir eis Bierger erëm kënnen unzefänke mat schaffen."

Virun deem Vott hat de Gary Diderich vun déi Lénk an der 1. Gemengerotssëtzung nom Récktrëtt vum Roberto Traversini als Buergermeeschter den Androck, dass en neie Wand an d'Déifferdenger Lokalpolitik koum. Et wäre rezent nämlech Gespréicher gefouert ginn tëscht der Majoritéit an der Oppositioun:

"Déi lescht Deeg ware relativ intensiv am Austausch. An ech hunn domat d'Gefill, dass mer aus enger Kris, an déi mer eragerode sinn, wat einfach eng Regressioun ass vun der Politik, wou mer och no baussen als Déifferdenger Gemeng net nëmmen am beschte Liicht do stoungen, awer eben och no bannen net déi einfachst Saachen hu misse matmaachen an erliewen, dass mer aus deene schwéieren Zäiten eraus, mengen ech, de Wee kënnen haut fannen, fir e gudde Schrëtt weider ze kommen! D'Motioun ass elo intiteléiert e Renouveau vun Déifferdeng“.

De Gary Diderich

Dës Motioun vun den Oppositiounsparteien LSAP, DP an déi Lénk, déi de Schäfferot ënner anerem opfuerdert, fir en Deontologiekodex auszeschaffen a bei grousse Projeten e Begleedungscomité anzesetzen, gouf e Mëttwoch de Moien eestëmmeg vum Gemengerot ugeholl.

Virum Hannergrond vum unanime Vott huet den Erny Müller vun der LSAP der Majoritéit Merci gesot: "Ech mengen, dat ass jo d'Zil! D'Zil ass jo net, eng Motioun virzestellen an ofzeleenen. D'Zil ass, dass déi Motioun eis weiderbréngt an eiser politescher Aarbecht, an ech mengen, dat ass heimat excellent geschitt!"

Och d'Astellungspolitik vun der Gemeng sollt méi transparent gehandhaabt ginn, huet den Erny Müller gemengt, an d'Affär Gaardenhaische sollt op kommunalem Plang ofgeschloss ginn, zum Deel oder ganz.

De François Meisch vun der DP huet betount, dass d'Motioun zum Zil hätt, fir Dysfonctionnementer wéi déi, déi déi lescht Woche bekannt goufen, ze verhënneren:

"Et geet elo drëms, fir sécher ze goen, dass et Opklärung gëtt, leider och an eise Gemengeservicer, mat alle Konsequenzen, déi dat da mat sech bréngt. An et geet drëms, dass strukturell Saachen en Place gesat ginn, déi méi Transparenz a Kontroll par Rapport zu Abusen an Interessekonflikter bréngen!"

Et géif een op e konstruktiven Neiufank fir Déifferdeng hoffen, sou de François Meisch, deen anengems e ganze Froekatalog eragereecht huet. Dozou huet déi dunn nach zukünfteg Buergermeeschtesch Christiane Brassel-Rausch bemierkt, dass fir déi nächst Gemengerotssëtzung an zwou Wochen nach net all d'Äntwerten do wären. Déi kéimen no an no, sou wéi se da virléichen.