Vum Ament vun de Perquisitiounenen 2018 un huet d'Stater Gemeng net méi mat der Sécherheetsfirma "Security-Schmitt" zesummegeschafft, sou d'Lydie Polfer.

Zanter 2018 schafft d'Stater Gemeng net méi mat "Security-Service-Schmitt"

„Vun deem Moment un, wou d’Perquisitiounen 2018 gemaach goufen, hu mer net méi mat der Sécherheetsfirma geschafft, einfach aus dem „Principe de précaution“ – dat huet d’Stater Buergermeeschtesch Lydie Polfer de Mëttwoch de Moien um CityBreakfast betount, nodeems se Ufank der Woch confirméiert hat, datt et am Kader vun enger Affär ronderëm „Security-Service-Schmitt“ eng Perquisitioun op der Stater Gemeng gouf.

Zanter iwwer 10 Joer schafft d’Gemeng fir de Volet „Evenementiel“ mat externe Firmaen. Dorënner och „Security-Service-Schmitt“, déi an de leschte Jore bis zu 117.000 Euro d’Joer fir hir Aarbechte vun der Gemeng krut. Vue datt et ëm de sougenannten „crowd management“ goung, huet ee keng Autorisatioun gebraucht. D’Stater Buergermeeschtesch Lydie Polfer:

Extrait Lydie Poler (Sécherheetsfirma)

"Aus Grënn, déi ech éierlech gesot och elo net weess, ass déi Perquisitioun gemaach ginn nëmmen, fir wat déi Gesellschaft fir d'Stad Lëtzebuerg fir 2015 an 2016 gemaach huet. Net 2017, wëll och do hu mer mat hinne geschafft, awer och mat anere Firmaen, sou wéi mer dat zanter 2008 maachen. Ech soen 2008, well ech bis dohin nogesicht hunn, mee vläicht géing een och nach méi fannen. Dunn ass d'läscht Joer de 16. Juli, ech selwer war do, eng Perquisitioun an de Büroe vun deem Service, deen dat organiséiert, gemaach ginn."

Méi kéint d’Stater Buergermeeschtesch awer net zu där Affär soen, et misst een elo ofwaarden, wat bei der Aarbecht vun der Justiz erauskéim.

Trottinette just, wann déi geséchert kënnen ofgestallt ginn

D'Gemeng wéilt an der Stad kee System hunn, wou d'Trottinetten einfach esou an der Géigend leien, dat och aus Sécherheetsgrënn.

"Déi Manéier, wéi déi Firma virgaangen ass, war net acceptabel a gouf och net acceptéiert, dofir hu se d'Trottinette missen ewechhuelen" dat huet d'Stater Buergermeeschtesch Lydie Polfer e Mëttwoch de Moien um CityBreakfast nach emol betount, nodeems d'US-Firma "Bird" jo Elektro-Trottinetten op eege Fauscht an der Stad zur Verfügung gestallt hat.

Antëscht sinn d'Trottinetten aus dem Circuit. Et wier e System, dee fir d'Gemeng einfach net acceptabel wier, wëll een net einfach sou den ëffentleche Raum fir sech selwer accaparéiere kéint, huet d'Lydie Polfer erkläert. An de leschte Joren huet d'Stater Gemeng 7 Entreprisen gehat, déi esou e Konzept an der Stad envisagéiert haten, wourun d'Stad Lëtzebuerg awer net interesséiert war, wëll se net wëllen, datt d'Trottinetten queesch duerch d'Landschaft stinn, och aus Sécherheetsgrënn. E puer vun den Trottinette vun der Firma "Bird" louchen zum Beispill op den Tramsschinnen, beschwéiert sech d'Lydie Polfer

Extrait Lydie Polfer (Trottinett)

"Wa mir als Stad eng Kéier géifen drun denken, awer esou e System anzeféieren, da musse mir fir d'éischt determinéieren, wou am ëffentleche Raum déi Plaze gemaach ginn, wou déi Saache geséchert kéinten ofgestallt ginn. Da mussen och d'Konditioune fixéiert ginn an da géinge mer dat ausschreiwen."

Dat misst an Transparenz geschéien, an dofir kéint et net sinn, datt eng Entreprise esou eng Decisioun einfach ouni den Accord vun der Stad Lëtzebuerg hëlt. D'Lydie Polfer huet ënnerstrach, datt si frou wier, datt een duerch dat neit Policegesetz vun 2018 eng gesetzlech Basis hätt, fir kënne Saisien ze maachen, wouvun ee Gebrauch gemaach hätt, wann d'Firma hir Trottinetten net selwer aus dem Circuit geholl hätt.