Déi nei Buergermeeschtere vu Biissen an Déifferdeng goufen e Freideg de Mëtteg vun der Inneministesch Taina Bofferding vereedegt.

Zu Déifferdeng iwwerhëlt d'Christiane Brassel-Rausch d'Rudder, zu Biissen den David Viaggi. No turbulenten Zäiten a béide Gemengen erwaart déi nei Gemengemamm, respektiv de Gemengepapp, eng Partie Erausfuerderungen.

Nodeems zu Déifferdeng de fréiere Buergermeeschter Roberto Traversini an der Suite vun der Gaardenhaischen-Affär zeréckgetruede war, huet déi drëttgréisst Gemeng am Land an Zukunft eng Buergermeeschtesch. E Freideg de Mëtteg gouf déi gréng Politikerin Christiane Brassel-Rausch vun der Inneministesch op hirem neie Poste vereedegt.

Et gëllt elo mol erëm Rou an d'Gemeng ze bréngen. Zu Déifferdeng mengt déi gréng Politikerin Christiane Brassel-Rausch, datt dat zwar keng einfach Aufgab wäert ginn, mä si weist sech awer zouversiichtlech: "Evident ass, datt de Schäfferot, datt d'Koalitioun nach ëmmer gutt funktionéiert. Et ass e respektvollt Mateneen-Ëmgoen. A wann dat dann evident bleift, wat ech jo wierklech hoffen, da mengen ech, datt mir kënnen eng gutt Aarbecht zesumme maache bis zum Schluss vun der Legislaturperiod."

Assermentatioun Buergermeeschteren / Rep. Claudia Kollwelter (25.10.19)

Zu Biissen iwwerhëlt den David Viaggi d'Rudder. Och hie gouf e Freideg de Mëtteg vun der Inneministesch Taina Bofferding op sengem neie Poste vereedegt. Nom Récktrëtt vum Jos Schummer iwwerhëlt de Vertrieder vun der Initiativ "Är Leit" d'Rudder an der Gemeng Biissen.

D'Vereedegung am Inneministère war natierlech e grousse Moment och fir den neie Gemengepapp vu Biissen. Et wier wichteg, déi Dossieren, déi an der Gemeng opstinn, an de Grëff an anstänneg viru gedriwwe ze kréien. Dorënner fält och den Dossier "Google": "Mir wäerten eis elo do eraschaffen an eis, wéi ech et schonn oft gesot hunn, eis Punkten do matdeelen a fuerderen, Transparenz ze weisen an deem Dossier, an da kucken mir, wéi et do weidergeet", sou den David Viaggi.

Fir d'Gemeng Biissen goufen och nach den Roger Sauerfeld als 1. Schäffen an d'Cindy Barros als 2. Schäffen vereedegt. An d'Gemeng Beefort huet mam Jean-Luc Nosbusch en neie Schäffen, genee wéi d'Gemeng Wäisswampech mam Joseph Vesque, déi all vun der Inneministesch assermentéiert goufen.

Communiqué

Assermentation de bourgmestres et d'échevins (25.10.2019)

Communiqué par: ministère de l'Intérieur

Par arrêté grand-ducal du 11 octobre 2019, Christiane Brassel-Rausch a été nommée aux fonctions de bourgmestre de la Ville de Differdange.

Par arrêté grand-ducal du 25 octobre 2019, David Viaggi a été nommé aux fonctions de bourgmestre de la commune de Bissen.

Par arrêtés ministériels du 25 octobre 2019, Jean-Luc Nosbusch a été nommé aux fonctions d'échevin de la commune de Beaufort, Cindy Barros, ép. Seyler et Roger Saurfeld ont été nommés aux fonctions d'échevins de la commune de Bissen et Joseph Vesque a été nommé aux fonctions d'échevin de la commune de Weiswampach.

Le 25 octobre 2019 à 14 h 30, les intéressés ont prêté entre les mains de Taina Bofferding, ministre de l'Intérieur, le serment prescrit par l'article 6 de la loi communale modifiée du 13 décembre 1988 dont la formule est la suivante:

«Je jure fidélité au Grand-Duc, d'observer la Constitution et les lois du pays, et de remplir avec zèle, exactitude, intégrité et impartialité les fonctions qui me sont confiées.»