Am Kader vun zwou Diplomiwwerreechungen, déi de 14. a 16. Oktober 2026 am groussen Auditoire vun der Maison du savoir um Campus Belval stattfonnt hunn, kruten 266 Studentinnen a Studenten hire Brevet de technicien supérieur (BTS) iwwerreecht.
Am Ganze goufen am Laf vum Studiejoer 2025/2026, zesumme mat den Diplomer, déi schonn um Enn vum Wantersemester ausgestallt goufen, 290 BTS-Diplomer verginn.
D'Absolventinnen an d'Absolvente koumen aus ville verschiddene Fachberäicher. D'Formatiounen decken ënner anerem d'Gesondheetswiesen, d'Konscht an den Design, de Commerce, d'Industrie, den Déngschtleeschtungssecteur an d'Handwierk of. Eng Première gouf et dëst Joer fir de BTS "Production industrielle automatisée" vum Lycée Privé Emile Metz, deen seng éischt Diploméiert gefeiert huet.
Nieft der Iwwerreechung vun den Diplomer goufen och Studente fir hir aussergewéinlech gutt Resultater ausgezeechent.
D'Ministesch fir Fuerschung an Héichschoul Stéphanie Obertin huet besonnesch de praxisorientéierte Charakter vun dëse Formatioune betount, bei deenen theoreetescht Wëssen a praktesch Erfarungen enk matenee verbonne ginn. Doduerch kéinten d'Formatioune flexibel op déi sech verännerend Ufuerderunge vun der Aarbechtswelt reagéieren.
D'Stéphanie Obertin huet och ënnerstrach, datt e BTS-Diplom vill Perspektiven opmécht. Et kéint een entwieder direkt an d'Beruffsliewen antrieden oder d'Studien op Héichschoulniveau weiderféieren.
Zum Ofschloss huet si den Engagement vun de Lycéeën, den Enseignanten an de professionelle Partner gelueft, déi mat hirer Aarbecht zur Qualitéit an zur Weiderentwécklung vun de BTS-Formatiounen zu Lëtzebuerg bäidroen.
