Dat schreift d’CSV-Justizministesch Elisabeth Margue an der Äntwert op eng parlamentaresch Fro vum LSAP-Deputéierten Dan Biancalana. Am Prisong zu Schraasseg goufen et an de leschte fënnef Joer am Ganzen 131 Interventioune vun deenen Ekippen, déi equipéiert si mat spezielle Schutzkleeder a Waffe wéi Paintball-Schosswaffen oder Pefferspray.
Aktuell géingen zu Schraasseg 19 GRIP-Agente schaffen. Hei wier net virgesinn, d’Ekipp ze vergréisseren. Um Uerschterhaff wieren et 27 Beamten. Well d’Zuel vun Interventioune géing eropgoen a wéinst der interner Organisatioun vum Prisong, kéint et mëttelfristeg noutwenneg ginn, d’Ekipp ze vergréisseren, esou d’Ministesch.
