Mat engem feierleche Staatsbegriefnes huet Lëtzebuerg e Samschdeg dem Grand-Duc Jean Äddi gesot. - Fotoen an déi ganz Zeremonie am Replay op RTL.lu.

E Samschdeg war et esou wäit: Land a Leit hunn dem verstuerwene Staatschef eng lescht Éier erwisen, si hunn dem Grand-Duc Jean Adieu zougeruff, si hunn "Äddi Jang" gesot. An d'Wieder, dat genee esou naass a kal war wéi annoncéiert, ass vu Minutt zu Minutt besser ginn, esou wéi och an der Trauer iwwer de Verloscht vun engem léiwe Mënsch d'Dankbarkeet iwwerwien huet, e gehat ze hunn ...

VIDEO: D'Begriefnes vum Grand-Duc Jean resuméiert
Déi emouvantste Biller vum Begriefnes vum Grand-Duc Jean hei nach eemol zesummegefaasst.

Kuerz no 11.15 Auer huet d'Trauer-Zeremonie an der Kathedral an der Stad ugefaangen. Mat derbäi e sëlleche Vertrieder vun den europäesche Kinnekshaiser, am Ganze Vertrieder aus 120 Länner an Dausende Leit an de Stroosse vun der Uewerstad; d'Zeremonie gouf och op engem groussen Ecran op der Place d'Armes iwwerdroen, um Enn hate sech och hei vill Leit versammelt.

AUDIO: Staatsbegriefnes: Andréck aus der Stad vum Annick Goerens

Virun der Mass gouf d'Lued vum Grand-Duc Jean vum Palais bis bei d'Kathedral gezu vun engem Militärgefier an zum Schluss an d'Kathedral era gedroen. Zaldoten a Scoute stounge Spaléier.

"Monseigneur, mir hunn Iech gär"

D'Mass gouf geleet vum Äerzbëschof Jean-Claude Hollerech – an et war eng emotionell Zeremonie. D'Prinzessin Marie-Astrid, déi eelsten Duechter vum Grand-Duc Jean, huet eng Liesung op Franséisch gemaach. Vu sengem jéngste Bouf, dem Prënz Guillaume, war et eng Liesung op Lëtzebuergesch.

D'Fürbitte goufe gehale vun den eelsten Enkelkanner vum Grand-Duc Jean. Den Ierfgroussherzog Guillaume huet den Ufank gemaach, op Lëtzebuergesch. D'Fürbitte waren deels och op Franséisch an Englesch.

A senger Priedegt, déi och an 3 Sprooche war, huet den Äerzbëschof dem Grand-Duc Jean seng Baarmhäerzegkeet a seng diskret Léift fir seng Heemecht, säi Land, seng Famill a fir d'Natur ervirgehuewen. Am Schlussappell huet hien dem verstuerwene Staatschef Merci gesot fir d'Léift fir eist Land. "Monseigneur, mir hunn Iech gär", ware seng Schlusswierder.

D'Maîtrise aus der Kathedral, ënnert der Leedung vum Marc Dostert, huet gesongen, d'Militärmusek, ënnert der Direktioun vum Jean-Claude Braun, huet gespillt. De Paul Breisch war op der Uergel. Mam Wilhelmus huet d'Zeremonie ugefaangen, d'Heemecht huet musikalesch de Schluss gemaach. Och Duddelsak-Musek, gespillt vun zwee Irish Guards, zu deenen de Grand-Duc Jean jo och gehéiert huet, war ze héieren – an huet d'Leit déif beandrockt a beréiert. De Grand-Duc Henri hat deen Ament Tréinen an den Aen ... an hien net eleng.

© Steve Müller

Mat der Musek vun den Irish Guards ass – nach ëmmer ganz emotional – d'Doudelued vum Grand-Duc Jean um Enn vun der reliéiser Zeremonie erausgedroe ginn op der Parvis vun der Kathedral. Méi spéit gouf de verstuerwene Staatschef am enke Familljekrees an der Krypta vun der Kathedral bäigesat. D'groussherzoglech Famill huet jo do hiert "Familljegraf".

Gäscht aus dem Ausland, Interessi vun hei

Et war eng emouvant Zeremonie, mat traditionelle Lidder, awer och méi iwwerraschende Momenter. No der Mass hunn Honnerte Leit virun der Kathedral gewaart, och fir d'Vertrieder aus dem Ausland, speziell vun de Kinnekshaiser, ze gesinn. Ënnert anerem waren aus der Belsch de Kinnek Philippe an d'Kinnigin Mathilde an de fréiere Kinnek Albert a seng Fra Paola op Lëtzebuerg komm. Aus Schweden war de Kinnek Carl Gustaf um Begriefnes, aus Spuenien de Kinnek Juan Carlos an d'Kinnigin Sofia, d'Prinzessin Anne aus England. De Prënz Albert vu Monaco hat sech och deplacéiert. Frankräich war duerch de fréiere President Nicolas Sarkozy vertrueden, Däitschland duerch de Joachim Gauck.

Déi lescht Deeg hate jo gewisen, wéi beléift de fréiere Groussherzog bei de Lëtzebuerger, bei de Leit hei am Land an och am Ausland war. Dausende Leit waren am Palais fir dem Grand-Duc Jean déi lescht Éier z'erweisen.

De Grand-Duc Jean gouf wéi gesot an der Krypta vun der Kathedral bäigesat. E Sonndeg, e Méindeg an en Dënschdeg ass d'Krypta op, et kann ee seene goen. Ëmmer moies vun 10 bis 12 a mëttes vun 14 bis 19 Auer.

Fotoen

Videoen

VIDEO: 1. Deel: Begriefnes vum Grand-Duc Jean
E Samschdeg um 9.30 Auer huet RTL Télé Lëtzebuerg mat der Live-Iwwerdroung vum Staatsbegriefnes ugefaangen. (Ufank bis bei d'Mass)
VIDEO: 2. Deel: Begriefnes vum Grand-Duc Jean
D'Mass zu Éiere vum Grand-Duc huet ronn 100 Minutte gedauert. Duerno ass de Grand-Duc Jean an der Krypta begruewe ginn.
VIDEO: Mir kucken op d'Liewe vum Grand-Duc Jean zeréck
De Guy Weber mat engem Réckbléck op d’Liewe vum Grand-Duc Jean. Produktioun: RTL 2019
VIDEO: Leschten Äddi fir de Grand-Duc Jean vun den Irish Guards
D'Lidd "Highland Cathedral" huet d'Lued mam Grand-Duc Jean aus der Kathedral begleet.

RTL Radio Lëtzebuerg: Spezialemissioun

AUDIO: RTL Radio Lëtzebuerg: Spezialemissioun Deel 1/4
AUDIO: RTL Radio Lëtzebuerg: Spezialemissioun Deel 2/4
AUDIO: RTL Radio Lëtzebuerg: Spezialemissioun Deel 3/4
AUDIO: RTL Radio Lëtzebuerg: Spezialemissioun Deel 4/4

Duerch d'Spezialemissioun op Radio Lëtzebuerg hunn d'Christiane Kremer an de Roy Grotz gefouert. Invitéen: den Historiker Jean-Marie Majerus, den Tom Lahr vu "Scouting in Luxembourg" an den Dechen Edmond Ries.