D'Rue Alphonse Weicker war bis e Freideg am Nomëtteg gespaart. Den Trafic geet zënter 16 Auer nees dem Horaire no op der ganzer Linn.

Temporär waren et Busnavetten tëscht dem Arrêt "Bibliothéik" a "Luxexpo". Zënter 16 Auer fiert den Tram awer nees normal op der ganzer Linn.

Géint 9.35 Auer e Freideg de Moie koum et zu engem Accident tëscht dem Tram an engem Bus um Kierchbierg. De Bus gouf op den Trottoire geschleidert, huet dobäi e Moto dee geparkt war ze pake kritt an huet dunn och nach e Bam an e Schëld matgerappt. Dobäi ass den Tram aus de Gleiser gesprongen.

VIDEO: Interview
Myriam Meyer, Directeur regional adjointe aus der Stad, mat Explikatiounen.

5 Persoune goufen dobäi blesséiert, dorënner d'Chauffeure vum Tram a vum Bus. 1 Persoun vun de 5 Blesséierten huet méi uerg Verletzungen dovunner gedroen. Si souz ganz vir am Tram an ass wéinst dem staarke Bremsen no vir gefall.

Am Tram souzen eisen Informatioune no tëscht 30 a 50 Passagéier, am Bus souz niewent dem Chauffeur just 1 Passagéier. Keng Persoun, déi sech an der Géigend vum Accident opgehalen huet, gouf blesséiert.

No engem Etat des lieux op der Plaz vun de Leit vu Luxtram gouf den Tram och nees mat engem Kran op d'Schinne gesat. Dofir gouf de Sécherheetsperimeter ronderëm den Accident vergréissert. Donieft huet och e spezielle Kran op d’Plaz misse kommen, fir de viischten Deel vum Tram erëm op d’Schinnen ze setzen. Well deen duerno net selwer ka fueren, gouf e vun enger anerer Maschinn an den Depot vu Luxtram gezunn. Dat huet Luxtram erkläert.

Op der Plaz waren 3 Ambulanzen, 1 Samu, en Equipage vun 25 Leit, 1 Tankwon an 2 Rüstween.