RTL-Informatiounen no ersetzt de Chris Mathieu de Fabien Grasser um Poste vum Chefredakter bei der franséischsproocheger Dageszeitung "Le Quotidien".

De Quotidien kritt en neien Chef-Redakter.

Déi franséischsproocheg Dageszeitung vum Grupp Editpress wäert eisen Informatiounen no an Zukunft vum Chris Mathieu geleet ginn. Dee war bis Enn 2017 och scho Responsabel vum L’essentiel Online, an ass vun do bei d’CSV-Fraktioun gewiesselt.

Hien iwwerhëlt deemno de Posten vum Fabien Grasser.

De Quotidien gëtt an der Moyenne vun engen 30.600 Leit den Dag gelies.

Aktuelle Chefredakter net informéiert

"Wahnsinn", seet de Chefredakter vum Quotidien Fabien Grasser, deen eegenen Aussoen no iwwert d’Medie gewuer ginn ass, datt hien ersat gëtt. „Ech war absolut net informéiert iwwert dës Decisioun. Ech ginn dat elo matzen am August gewuer, duerch Medien a Journaliste-Kollegen“, sou de Fabien Grasser an engem Gespréich mat der Wochenzeitung Woxx.

Hie war 9 Joer laang Chefredakter beim Quotidien a war notamment bekannt fir seng Artikelen iwwert d’Finanzplaz. Hie gouf och am Zesummenhang mat de Panama Papers vun der Enquetekommissioun um EU-Parlament als Expert gehéiert.