Am Alter fit a gesond bleiwen an ausserdeem sozial Kontakter fleegen, esou d’Ziler vum nationale Sportsdag, organiséiert an der Sportshal zu Ettelbréck.

Fit 50 Plus nennt sech dës Aktioun. De Sport- a Familljeministère hunn an d’Pattestad invitéiert gehat.

Zanter etleche Jore gëtt et d'Aktioun "Gesond Iessen - Méi Beweegen" an adresséiert sech u Kanner a Jugendlecher. Doraus entstanen ass "Fit 50 Plus".

Iwwer 34 Prozent vun der Lëtzebuerger Populatioun ass iwwer 50 Joer. D’Damme sinn an der Majoritéit a si spruddele vu Begeeschterung wann et heescht sech ze beweegen.

17 verschidde Sports-Ateliere goufen de Leit proposéiert. Alles Clibb vun Ettelbréck, déi hire Sport presentéiert hunn. Vun de Bouschéisser, iwwer d’Kloterer bis zu de rhythmeschen Turner.

Bis 6 Auer waren d’Leit zu Ettelbréck an a ronderëm d’Sportshal um Deich aktiv an de Gros ass sécherlech op de Goût komm, fir sech reegelméisseg sportlech fit ze halen.