En Donneschdeg den Owend kuerz virun 20 Auer stoung zu Heischent e Stall e Flamen. 600 Schwäin hu missten noutgeschluecht ginn.

Ronn 40 Pompjeeën aus der Regioun Ale Bësch, vun Ettelbréck, vu Klierf, vu Feelen, vu Gréiwels a vu Wolz waren am Asaz, fir ze läschen. Schlussendlech hu ronn 600 Schwäi misste geschluecht ginn, dat huet eis de Felix Wildschutz, de President vun der Veterinärsinspektioun matgedeelt. Och fir si war dëst en ongewinnt groussen Asaz.

En Donneschdeg den Owend géint 19.45 stoung den Daach vum Stall a Flamen an et koum zu enger staarker Dampentwécklung. Géint 22 Auer gouf d'Inspection vétérinaire vum 112 kontaktéiert, dat nodeems de Brand scho geläscht war. Séier war kloer, dass d'Schwäi vu geschmoltenem Isolatiounsmaterial, dat vum Daach koum, blesséiert goufen.

Géint 23 Auer war dann eng Ekipp vum Schluechthaus op der Plaz, fir d'Déieren am Respekt vum Déiereschutz vun hirem Leed z'erléisen. Ëm 600 gréisser Fierkele vun tëscht 30-40 Kilogramm waren heivunner betraff.

Weider Accidenter aus dem CGDIS-Bulletin

4 Blesséierter gouf et dann op eise Stroossen, dat zu Wëntger an tëscht Wilwerdang an der Wemperhaart, wou Automobilisten jee an  e Bam gerannt waren, an op der A6, wou en Auto d’kalifornesch Mauer ze pake krut.