D'Buergermeeschtere vun de Gemengen, bei deenen d'Spuerkeess-Agencë sollen zougemaach ginn, si rosen an enttäuscht iwwert déi Decisioun vun der Bank.

Fermeture Spuerkeess-Agencen (1) / Reportage Eric Ewald

Mat engem Bréif un d'Generaldirektesch vun der Spuerkeess an un de Premier wëllen d'Buergermeeschtere vun 8 Gemenge probéieren, d'Zoumaache vun der Bankagence bei sech, Enn Mäerz, ze verhënneren. Donieft huet een och eng Entrevue gefrot, fir déi eegen Doleancen duerzeleeën.

Extrait Natalie Silva an Tom Jungen

De Réiserbänner Buergermeeschter Tom Jungen hat jo schonns am Virfeld annoncéiert, dass fir hien och de Finanzminister, an de ganze Regierungsrot kloer an der Responsabilitéit stéingen.

Knapp zwou an eng hallef Wochen no der Annonce vun der Spuerkeess, fir am Ganzen 11 Agencen zouzemaachen, sinn e Freideg de Moie 7 betraffe Buergermeeschteren zu Réiser virun d'Press getrueden. De lokale Gemengepapp sot sech dobäi nach ëmmer enttäuscht a rosen iwwert d'Aart a Weis vun där Ukënnegung.

D'Form, dat duerch d'Press gewuer ginn ze sinn, wär net an der Rei gewiescht, sot den Tom Jungen: "Mir sinn der Meenung, datt et net d'Aart a Weis ass, iwwert e Pressecommuniqué oder e lapidare Mail d'Gemengen ze informéieren. Sou spréngt een net mat Gemengen ëm".

Déi zum groussen Deel verlässlech Partner vun der Spuerkeess wären. Wuel hätt een nomëttes als betraffene Buergermeeschter eng Mail kritt, an där de lokale Vertrieder vun der Spuerkeess eng Entrevue gefrot hätt, ouni dass doraus awer ervirgaange wär, dass d'Agence géif zougemaach ginn. Wann eng privat Bank sou eng Decisioun huele géif, da géif ee wuel d'Gespréich sichen, mä sech soen, dass dat eben e private Betrib wär. Dat gëllt awer net fir d'Staatsbank, sou de Réiser Buergermeeschter, déi zu 100% an ëffentlecher Hand ass: "Fir een Deel vun eis, déi dës Erfarung hu misse scho maachen, schéngt et an der Lescht bal symptomatesch ze ginn, fir Entreprisen, déi an ëffentlecher Hand sinn".

Verschidde betraffe Gemenge wären nämlech duerch d'Eisebunn, d'Police an d'Post, déi schonn hirer Wee gaange wären, gebrannte Kanner. Dofir wär elo bei der Spuerkeess méi eng hefteg Reaktioun komm. D'Gefor géif bestoen, dass aus de concernéierte Gemenge Schlofgemenge géife ginn. Dobäi wär a senger Spuerkeess-Agence nach Liewen, an dowéinst géif een op en Austausch mat der Bank hoffen, huet den Tom Jungen erkläert. Woubäi een net blann wär, wat d'Entwécklung bei de Banken ugeet, an och net géint d'Digitalisatioun: "Et bleift, datt een och bei deem Digitaliséierungsprozess muss d'Leit mathuelen, deenen déi méi Problemer hunn och eng Chance ze ginn, fir sech ëmzestellen, awer virun allem déi, déi een net mathuele kann, net ze verléieren".

De Buergermeeschter vu Réiser huet an deem Kontext zum Beispill eeler Leit genannt, Leit ënner enger Tutelle financière, awer och den Handel an d'Handwierk.

Den Henri Haine, Buergermeeschter vu Rëmeleng, huet ervirgehuewen, dass vun där Decisioun net nëmmen de ländleche Raum concernéiert wär: "Ech mengen dat ass wierklech enttäuschend, wann een do gesäit, wéi een do souwuel vun der Spuerkeess, wéi och vum Staat, deen hei concernéiert ass, als Gemeng am Stach gelooss gëtt. Wou mär alleguer Efforte maachen, fir nach ee Stadliewen mat Geschäfter ze erhalen, gëtt en hei wierklech am Stach gelooss. Ech mengen do huet de Staat och eng Responsabilitéit, fir eis do weider ze hëllefen. Mir schwätze vu Revaloriséierung vun eise Stadzentren, et gi vill Investitioune vun de Gemenge selwer gemaach an et ass wierklech enttäuschend ze gesinn, dann eenzel Agencen an och aner Betriber wéi Post asw. hir Agencen zoumaachen".

Extrait Henri Haine

Trotz villen Operatiounen an der Agence wéilt d'Spuerkeess hir Dieren zu Rëmeleng zoumaachen an d'Clienten ëmmer méi op den Online-Banking drécken, sou den Henri Haine, deen nach d'Fro gestallt huet, wat déi Fermeture da wär, wann net eng Spuermesure.

Fermeture Spuerkeess-Agencen (2) / Reportage Eric Ewald